ఇంటి నిర్మాణంలో విషాదం.. కరెంట్ షాక్‌తో ఇద్దరి దుర్మరణం

హైదరాబాద్ : చిక్కడపల్లి పోలీస్ స్టేషన్ పరిధిలో దారుణం చోటు చేసుకుంది. హైటెన్షన్ వైర్ల కారణంగా కరెంట్ షాక్ తగలడంతో.. ఇద్దరు వ్యక్తులు దుర్మరణం చెందారు. చిక్కడపల్లి సీఐ సైరెడ్డి వెంకట్‌రెడ్డి తెలిపిన వివరాల ప్రకారం.. బాగ్‌లింగంపల్లి ఎల్‌ఐజీ క్వార్టర్స్‌లో నివాసం ఉండే మన్సూక్‌లాల్ (70) తన ఇంటి రెండో అంతస్తులో పెంట్ హౌస్ నిర్మాణం ప్రారంభించాడు. ఇందు కోసం ఇనుప కడ్డీలను కింది నుంచి పైకి అందిస్తుండగా.. అవి హైటెన్షన్ విద్యుత్ వైర్లకు తగిలాయి.

ఇనుప కడ్డీల్లోకి కరెంట్ ప్రవహించడంతో.. మన్సూక్‌లాల్‌తోపాటు వాహిద్ అనే కార్మికుడు కూడా అపస్మారక స్థితిలోకి వెళ్లారు. వెంటనే వారి సమీపంలోని హాస్పిటల్‌కు తరలించగా.. అప్పటికే చనిపోయారని డాక్టర్లు తెలిపారు. వారిని కాపాడే ప్రయత్నంలో ఇంటి యజమాని కుమారుడు, పొరుగింట్లో ఉండే యువకుడు కూడా గాయపడ్డారు. అనూహ్యంగా ఇద్దరు మరణించడంతో.. ఎల్‌ఐజీ క్వార్టర్స్‌లో విషాద ఛాయలు అలుముకున్నాయి.