IAS అంటే అయ్యా ఎస్! అమ్మా ఎస్!!

IAS అంటే Indian Administrative Serves (ఇండియన్ అడ్మినిస్ట్రేటివ్ సర్వీసెస్). దేశంలోని అత్యున్నత ప్రభుత్వ కొలువులకు ఎంపికయ్యేది ఈ సర్వీసుల నుంచే. జిల్లా పరిపాలన యంత్రాంగాన్ని నడిపించేది వీరే. కలెక్టర్లు, ఎస్పీలు వంటి వారు ఈ పరీక్షల ద్వారానే ఎంపికవుతూ ఉంటారు. (గ్రూప్ సర్వీస్ నుంచి కూడా తమ అనుభవం ఆధారంగా కలెక్టర్లు, ఎస్పీలుగా ప్రమోషన్ పొందవచ్చు). పబ్లిక్ సర్వెంట్ అంటే ప్రజలకు సేవలు చేయడం కానీ...తెలంగాణలోని ఇద్దరు పబ్లిక్ సర్వెంట్లు ఆ ఉన్నత పదవులకు తలవంపులు తెచ్చేలా వ్యవహారించారు.

ఐఏఎస్ అంటే అయ్యా ఎస్ అంటూ రాజకీయ నాయకులు, ప్రజాప్రతినిధుల ముందు మోకరిల్లి వాళ్లేం చెబితే అది చేయడానిక తలాడించడం కాదని...ఓ సినిమాలో డైలాగ్ కూడా ఉంది.

68వ గణతంత్ర దినోత్సవ వేళ జగిత్యాల కలెక్టర్ డాక్టర్ శరత్.. సీఎం కేసీఆర్ కు అయ్యా ఎస్ అని బహిరంగంగా అన్నారు. ‘జగిత్యాల నూతన జిల్లా జైత్రయాత్రలో సగౌరవంగా వంద రోజుల పాలన పూర్తి చేసుకుని ప్రభుత్వ సంక్షేమ పథకాలను ప్రజలకు దగ్గరగా చేరవేస్తున్న ఈ శుభ సందర్భంగా.. మూడు శతాబ్దాల చరిత్ర కలిగిన అద్భుతమైన, చరిత్రాత్మక ‘జగిత్యాల ఖిల్లా’లో తొలి గణతంత్ర వేడుకలను నిర్వహించే అవకాశం కల్పించిన తెలంగాణ రాష్ట్ర తొలి ముఖ్యమంత్రి గౌరవనీయులు కల్వకుంట్ల చంద్రశేఖర్‌రావు గారికి.. శిరస్సు వంచి పాదాభివందనం చేస్తున్నా...’ అంటూ జగిత్యాల కలెక్టర్‌ డాక్టర్‌ శరత్‌ గురువారం జిల్లా కేంద్రంలో జరిగిన గణతంత్ర వేడుకల్లో తన ప్రసంగాన్ని ప్రారంభించారు. దీంతో సభికులు అవాక్కయ్యారు. వేడుకకు హాజరైన ప్రజలు కూడా నోరెళ్లబెట్టారు.

అంతటితో ఆగకుండా.. జగిత్యాల జిల్లా అభివృద్ధికి, ముఖ్యంగా ఖిల్లా అభివృద్ధికి పాటు పడుతున్న నిజామాబాద్‌ ఎంపీ.. కల్వకుంట్ల కవిత గారికి శుభాభివందనాలు అన్నారు. ఇదిలా ఉంటే.. మెట్‌పల్లి సబ్‌ కలెక్టర్‌ ముషర్రఫ్‌ అలీ ఏకంగా గ్యాలరీలో కూర్చొన్న సీఎం కుమార్తె, ఎంపీ కవిత దగ్గరికి వెళ్లి ఆమె ముందు మోకాళ్ల మీద కూర్చొని ముచ్చటించారు. దీంతో కార్యక్రమాలన్నీ పూర్తయ్యే వరకు కలెక్టర్‌ శరత్‌.. సబ్‌ కలెక్టర్‌ ముషర్రఫ్‌ అలీ వ్యవహారంపైనే చర్చ జరిగింది.

వీళ్లను చూస్తుంటే..ఐఏఎస్ అంటే అయ్యా ఎస్, అమ్మా ఎస్ గా మార్చేసిన వీరు తీరు పట్ల సోషల్ మీడియాలో విమర్శలు మొదలయ్యాయి.