త్వరలో హుస్సేన్ సాగర్‌లో రెండు ఐల్యాండ్‌లు

హైదరాబాద్ నగర నడిబొడ్డులో ఉన్న హుస్సేన్ సాగర్‌లో రెండు ఐల్యాండ్‌లు నిర్మించనున్నట్లు హెచ్ఎండీఏ కమిషనర్ డాక్టర్ టి. చిరంజీవులు వెల్లడించారు. ఈ మేరకు ప్రతిపాదనలు పంపినట్లు చెప్పారు. సంజీవయ్య పార్క్, జల విహార్ మధ్య ఈ ఐల్యాండ్‌లను నిర్మించనున్నట్లు చెప్పారు. హైదరాబాద్ యాచ్ క్లబ్‌లో బుధవారం సాయంత్రం జరిగిన తెలంగాణ స్టేట్ ఓపెన్ సెయిలింగ్ ఛాంపియన్‌షిప్స్ అవార్డుల ప్రధానోత్సవ కార్యక్రమంలో ముఖ్య అతిథిగా పాల్గొన్న చిరంజీవులు ఈ విషయాలను మీడియాకు వెల్లడించారు.

రాబోయే నాలుగు ఐదు నెలల్లో ఈ ఐల్యాండ్‌లను అందుబాటులోకి తీసుకురానున్నట్లు చెప్పారు. ఒక్కో ఐల్యాండ్‌ను ఎకరం విస్తీర్ణంలో నిర్మించినున్నట్లు వివరించారు. సాగర్‌లో నుంచి తీసిన చెత్తచెదారంతో ఈ ఐల్యాండ్‌లను నిర్మిస్తామని తెలిపారు. అందుకనే సాగర్ నుంచి తీసిన చెత్తను సరస్సుకు ఒకవైపు ఉంచామన్నారు. ఈ ఐల్యాండ్‌లపై పచ్చని మొక్కలు, గడ్డిని పెంచి సందర్శకులకు కొత్త అనుభూతిని అందిస్తామన్నారు. సాగర్‌లోని చెత్తనే వాడి ఐల్యాండ్‌లు నిర్మించడం వల్ల బయటి నుంచి మెటీరియల్‌ను తెచ్చే అవసరం ఉండదని చెప్పారు. దీనికి వల్ల నిర్మాణ ఖర్చు కూడా చాలా తగ్గుతుందన్నారు.