కారులో ఇద్దరు మహిళల కిడ్నాప్.. ఒకరిపై గ్యాంగ్ రేప్

ఇద్దరు మహిళలను కారులో కిడ్నాప్ చేయడమే కాకుండా.. వారిలో ఒకరిపై ముగ్గురు వ్యక్తులు సామూహిక అత్యాచారానికి పాల్పడిన ఘటన సోమవారం హైదరాబాద్ శివారులో కలకలం సృష్టించింది. బస్సు కోసం వేచిచూస్తున్న ఇద్దరు మహిళలను కారులో ఎక్కించుకున్న మృగాళ్లు ఈ ఘాతుకానికి పాల్పడ్డారు. హయత్‌నగర్‌ పోలీస్‌స్టేషన్‌ పరిధిలో జరిగిన సంఘటనకు సంబంధించిన వివరాలు ఇలా ఉన్నాయి.

చంపాపేట డివిజన్‌ యాదగిరినగర్‌ కాలనీకి చెందిన మహిళ(33) పాత చీరల వ్యాపారం చేస్తుంటుంది. ఎల్‌బీ నగర్ కామినేని ఆసుపత్రి వెనుక ఉండే మరో మహిళ(30) ఇళ్లలో పనిచేస్తుంది. వీరిద్దరూ ఒకరికొకరు పరిచయస్తులు. వీరిద్దరూ ఆదివారం అర్ధరాత్రి 2 గంటల సమయంలో వ్యక్తిగత పనిమీద హయత్‌నగర్‌కు వెళ్లేందుకు దిల్‌సుఖ్‌నగర్‌లో బస్సు కోసం నిలబడ్డారు. ముగ్గురు గుర్తు తెలియని వ్యక్తులు కారులో వచ్చి హయత్‌నగర్‌ వైపు వెళ్తున్నామని, తమతో వస్తే అక్కడ దింపేస్తామని ఎక్కించుకున్నారు. దారిలో మహిళలతో అసభ్యంగా ప్రవర్తించారు.

హయత్‌నగర్‌ వద్దకు రాగానే కారు నిలపాలని కోరినా ఆపకుండా ముందుకు వెళ్లారు. పెద్ద అంబర్‌పేట వైపు వెళ్తుండటంతో మహిళలు అభ్యంతరం చెప్పారు. అయినా పట్టించుకోకుండా ఔటర్‌ రింగురోడ్డువైపు తీసుకెళ్లారు. కారు ఔటర్ రింగురోడ్డు వద్దకు వెళ్లగానే ఎల్బీనగర్‌ మహిళ కారు డోర్ తెరిచి అందులోంచి దూకేసింది. వెంటనే అక్కడి నుంచి పారిపోయింది. మరో మహిళను ఔటర్ రింగురోడ్డు సర్వీసు రోడ్డు ద్వారా గండి చెరువు దారిలోని నిర్మానుష్య ప్రదేశానికి తీసుకెళ్లారు.

కారులో నుంచి దించి ఒకరి తరవాత ఒకరు సామూహిక అత్యాచారం చేశారు. తరవాత ఆమె వద్ద ఉన్న సెల్‌ఫోన్, రూ.2 వేల నగదు లాక్కుని పరారయ్యారు. ఎలాగోలా ఇంటికి చేరుకున్న బాధితురాలు సోమవారం హయత్‌నగర్‌ పోలీసులకు ఫిర్యాదు చేసింది. పోలీసులు కిడ్నాప్, గ్యాంగ్ రేప్ కింద కేసు నమోదు చేసుకుని దర్యాప్తు చేస్తున్నారు. ఆమెను పరీక్షల నిమిత్తం ఆసుపత్రికి తరలించారు.