ఉర్దూ అందరి భాష: మంత్రి తుమ్మల

ఉర్దూ అందరి భాష అని మంత్రి తుమ్మల నాగేశ్వర్‌రావు అన్నారు. గురువారం (నవంబర్ 16) ఆయన అసెంబ్లీలో ముఖ్యమంత్రి తరఫున ‘అధికార భాష సవరణ బిల్లు’ను ప్రవేశపెట్టారు. దీనిపై సంక్షిప్త చర్చ అనంతరం శాసనసభ బిల్లుకు ఆమోదం తెలిపింది. ఈ సందర్భంగా మంత్రి తుమ్మల ‘ఉర్దూ రెండో అధికార భాష బిల్లు’ను సమర్థించిన సభ్యులందరికీ, అన్ని పార్టీలకు కృతజ్ఞతలు తెలిపారు. ఉర్దూ అకాడమీని పునరుద్ధరిస్తామని చెప్పారు. ‘తెలుగు భాషపై సీఎం కేసీఆర్‌కు అపారమైన అభిమానం ఉంది. రేపు తెలుగు భాషపై ఆయన ప్రకటన చేస్తారు’ అని తుమ్మల తెలిపారు.

అధికార భాష సవరణ బిల్లుపై చర్చ సందర్భంగా ఎంఐఎం నేత అక్బరుద్దీన్ ఒవైసీ మాట్లాడుతూ.. ఉర్దూను రెండో అధికారిక భాషగా గుర్తించినందుకు సీఎం కేసీఆర్‌కు ధన్యవాదాలు తెలిపారు. ‘గత ప్రభుత్వాలు ఉర్దూ భాషను నిర్లక్ష్యం చేశాయి. ప్రస్తుత ప్రభుత్వం మైనార్టీ సంక్షేమానికి కృషి చేస్తోంది. అందుకే ప్రభుత్వాన్ని అభినందిస్తున్నా’ అని ఆయన అన్నారు.

గురువారం అసెంబ్లీలో గురుకుల పాఠశాలలు, విద్యాసంస్థల్లో మౌలిక సదుపాయాలు, వైద్య శాఖలో పోస్టుల భర్తీ తదితర అంశాలపై సభ్యులు అడిగిన ప్రశ్నలకు సీఎం కేసీఆర్‌తో పాటు డిప్యూటీ సీఎం కడియం శ్రీహరి, మంత్రి జగదీష్‌ రెడ్డి, వైద్య శాఖ మంత్రి లక్ష్మారెడ్డి తదితర మంత్రులు సమాధానం ఇచ్చారు. ఆ తర్వాత అధికార భాష సవరణ బిల్లుతో పాటు లోకాయుక్త చట్ట సవరణ బిల్లు, దేవాదాయ శాఖ చట్ట సవరణ బిల్లులకు శాసనసభ ఆమోదం తెలిపింది. అనంతరం డిప్యూటీ స్పీకర్ పద్మాదేవేందర్‌ రెడ్డి అసెంబ్లీని శుక్రవారానికి వాయిదా వేశారు.