Pawan Kalyan Convoy Accident: పవన్‌ కాన్వాయ్‌కు ప్రమాదం.. లారీ ఢీకొట్టి 8 మందికి గాయాలు

జనసేన అధినేత పవన్‌ కళ్యాణ్‌‌కు ప్రమాదం తప్పింది. ఆయన ప్రయాణిస్తున్న కాన్వాయ్‌‌లోని సెక్యూరిటీ వాహనం లారీని ఢీకొట్టింది. ప్రమాదంలో 8 మంది గాయపడ్డారు. వీరిలో ముగ్గురు సెక్యూరిటీ సిబ్బంది తీవ్రంగా గాయపడ్డారు. పవన్ కళ్యాణ్ గురువారం (నవంబర్ 15) రాత్రి కాకినాడ నుంచి రాజమండ్రికి వెళ్తుండగా ఈ ప్రమాదం జరిగింది. తూర్పుగోదావరి జిల్లాలో పర్యటిస్తున్న పవన్‌.. పలు ప్రాంతాల్లో నిర్వహించిన సభల్లో పాల్గొన్నారు. అనంతరం రాజానగరంలో జనసేన సభలో పాల్గొనడానికి వెళ్తుండగా ఈ ప్రమాదం జరిగింది.

రంగంపేట మండలంలోని రామేశంపేట వద్ద పవన్ ప్రైవేట్ భద్రతా సిబ్బంది ప్రయాణిస్తున్న వాహనం లారీని ఢీకొట్టింది. ప్రమాదంలో 8 మంది భద్రతా సిబ్బంది గాయపడ్డారు. గాయపడిన వారిలో అరవింద్, శివ, కె. శ్రీకాంత్, నవీన్‌, రామకిశోర్‌, జావీద్‌, బాబి, బి. శ్రీకాంత్‌ ఉన్నారు. వీరిని చికిత్స నిమిత్తం రాజానగరం సమీపంలోని జీఎస్‌ఎల్‌ ఆస్పత్రిలో చేర్పించారు.

ప్రమాదానికి గురైన వాహనం కంటే కాస్త ముందే పవన్‌ ప్రయాణిస్తున్న వాహనం వెళ్లిపోయింది. ఆ తర్వాత వెళ్తున్న ప్రైవేట్ భద్రతా సిబ్బంది వాహనం ప్రమాదానికి గురైంది. ప్రమాదంలో పవన్‌తో పాటు అందరికీ ప్రాణాపాయం తప్పటంతో అభిమానులు, జనసేన కార్యకర్తలు ఊపిరి పీల్చుకున్నారు.


కుట్రగా భావించాల్సి ఉంటుంది..
ఘటనను రాష్ట్ర ప్రభుత్వం సీరియస్‌గా తీసుకోవాలని, ప్రమాదానికి కారణాలపై విచారణ చేపట్టాలని జనసేన నాయకులు డిమాండ్ చేస్తున్నారు. లేని పక్షంలో కుట్రగా భావించాల్సి ఉంటుందని హెచ్చరించారు. ‘మన నాయకుడు సంపూర్ణ అయురారోగ్యాలతో ఉండాలని కోరుకుంటున్నాం. ఈ సంఘటనపై సీరియస్‌గా విచారణ జరిపి కారణాలు తెలపాలని ప్రభుత్వానికి విజ్ఞప్తి. ఎలాంటి ప్రమాదం జరగనందుకు అంజనేయ స్వామికి కృతజ్ఞతలు’ అంటూ ఓ ప్రకటన విడుదల చేశారు.