వైసీపీ అభ్యర్థి రెడీ..ఎన్నిక రసవత్తరం!

ఏపీ అసెంబ్లీ కోటాలోని రాజ్యసభ ఎన్నిక రసవత్తరంగా మారింది. తమకు దక్కనున్న ఏకైక సీటు కోసం అభ్యర్థిని ప్రకటించేసింది వైఎస్సార్ కాంగ్రెస్ పార్టీ. రాజ్యసభ ఎన్నికల్లో వైసీపీ తరఫు నుంచి వేమిరెడ్డి ప్రభాకర్ రెడ్డి పోటీలో ఉంటారని ఇటీవలే ఆ పార్టీ ఎంపీ విజయసాయిరెడ్డి ప్రకటించారు. తాజాగా వైకాపా అధినేత జగన్ మోహన్ రెడ్డి ఈ విషయాన్ని ధ్రువీకరించారు. వేమిరెడ్డిని పార్టీ శ్రేణులకు పరిచయం చేశారు జగన్ మోహన్ రెడ్డి. ప్రకాశం జిల్లాలో పాదయాత్రలో ఉన్న జగన్ వేమిరెడ్డిని పార్టీ శ్రేణులకు పరిచయం చేశారు.

ఈ నెల ఏడో తేదీన వేమిరెడ్డి నామినేషన్ దాఖలు చేయనున్నట్టుగా వైఎస్ జగన్ తెలిపారు. ఏపీ అసెంబ్లీ కోటాలో మొత్తం మూడు సీట్లకు ఎన్నిక జరగనుంది. బలాబలాల ప్రకారం వైకాపాకు ఒక సీటు టీడీపీకి రెండు సీట్లు దక్కుతాయి. తెలుగుదేశం పార్టీ ఇంకా అభ్యర్థులను ఖరారు చేయలేదు. ఈ విషయంలో చాలా పేర్లే వినిపిస్తూ ఉన్నాయి. అయితే అధికారిక ప్రకటన ఏమీ రాలేదు ఇంకా.

ఇక్కడ మరో అంశం ఏమిటంటే.. తెలుగుదేశం పార్టీ ఇద్దరు అభ్యర్థులను మాత్రమే ప్రకటిస్తుందా? లేక వైకాపా సీటుకు కూడా తమ అభ్యర్థిని బరిలో ఉంచుతుందా? అనేది ఆసక్తిదాయకమైన అంశం. బలాబలాల ప్రకారం అయితే.. మూడు సీట్లకు ముగ్గురు అభ్యర్థులు నిలిస్తే ఎన్నిక ఏకగ్రీవంగా ముగుస్తుంది. అలాగాక టీడీపీ మూడో అభ్యర్థిని కూడా బరిలోకి దించితే పోలింగ్ కు దారి తీయవచ్చు.

అప్పుడు కూడా వైసీపీ అభ్యర్థి మినిమం మెజారిటీతో బయటపడే అవకాశం ఉంది. ఇప్పటికే చాలా మంది ఎమ్మెల్యేలు వైకాపా నుంచి టీడీపీలోకి ఫిరాయించారు. ఇలాంటి నేపథ్యంలో మరో ఇద్దరు ముగ్గురు ఎమ్మెల్యేలు ఫిరాయిస్తే.. వైసీపీ అభ్యర్థి ఓడిపోయే అవకాశం ఉంది. అయితే రాజ్యసభ సభ్యుడి ఎన్నిక విషయంలో విప్ జారీ చేసే అవకాశం ఉంటుంది. ఈ నేపథ్యంలో ఎలాగైనా తమ అభ్యర్థిని తాము గెలిపించుకోగలమనే విశ్వాసంతో ఉంది జగన్ పార్టీ.