డ్రగ్స్ కేసు కోసమే కేసీఆర్‌తో పవన్!

తెలంగాణ ముఖ్యమంత్రి కేసీఆర్ ను జనసేన అధిపతి పవన్ కల్యాణ్ కలవడం వెనుక కారణం డ్రగ్స్ వ్యవహారమే అని అంటున్నారు కాంగ్రెస్ సీనియర్ నేత వీ హనుమంతరావు. తెలంగాణ రాష్ట్ర ప్రభుత్వాన్ని పవన్ కల్యాణ్ అభినందించడం పట్ల కూడా వీహెచ్ అభ్యంతరం చెప్పారు. దేశానికి తెలంగాణ రాష్ట్ర ప్రభుత్వం ఏ విధంగా ఆదర్శమో చెప్పాలని వీహెచ్ అన్నారు.

కొన్ని నెలల కిందట టాలీవుడ్ ను డ్రగ్స్ కేసు ఉక్కిరిబిక్కిరి చేసిన సంగతి తెలిసిందే. ఆ వ్యవహారంలో అనేక మంది సినీతారల పేర్లువినిపించాయి. ఆ కేసును దర్యాప్తు చేస్తున్న సిట్ ముందు కొంతమంది హాజరయ్యారు. అందుకు సంబంధించి ఇటీవలే చార్జిషీటు దాఖలైంది. అందులో కెల్విన్ అనే డ్రగ్ డీలర్ పేరు లేదని.. పవన్ కల్యాణ్ ఆ పేరును తప్పింపజేశాడనేది వీహెచ్ ఆరోపణ. అందుకు సంబంధించే పవన్ కల్యాణ్ కేసీఆర్ తోసమావేశం అయ్యాడని వీహెచ్ అంటున్నారు.

తెలంగాణ రాష్ట్రంలో బోలెడన్ని సమస్యలు ఉన్నాయని.. రైతలను పరామర్శించేంత తీరిక పవన్ కు లేదా? అని వీహెచ్ ప్రశ్నించారు. కావాలంటే పవన్ కల్యాణ్ ను తను రైతుల దగ్గరకు తీసుకెళ్తా అని ఆయన ప్రకటించారు.