వీడియో గేమ్ కొనివ్వలేదని విద్యార్థి ఆత్మహత్య

పిల్లలు వీడియో గేమ్స్‌కు బానిసలుగా మారితే ఎంత దుష్ప్రభావం ఉంటుందో తెలియజెప్పే ఘటన ఇది. వీడియో గేమ్ కొనివ్వడానికి తల్లిదండ్రులు నిరాకరించారని తీవ్ర మనస్తాపానికి గురైన ఓ ఇంజనీరింగ్ విద్యార్థి ప్రాణాలు తీసుకున్నాడు. ఇంటిపై నుంచి దూకి ఆత్మహత్య చేసుకున్నాడు. ఈ విషాదకర సంఘటన హైదరాబాద్ శివారు అబ్దుల్లాపూర్‌మెట్ మండలంలోని కుంట్లూరు గ్రామంలో చోటుచేసుకుంది. గ్రామానికి చెందిన గండు శ్రీనివాస్, పద్మ దంపతులకు అభినయ్ (17) ఒక్కగానొక్క కొడుకు. ఇటీవలే గ్రామంలో కొత్తగా రెండంతస్తుల భవనం కట్టుకున్నారు.

నాదెర్గుల్‌లోని ఎంవీఎస్ఆర్ ఇంజినీరింగ్ కాలేజీలో అభినయ్ బీటెక్ మొదటి సంవత్సరం చదువుతున్నాడు. ఆగస్టు 2 తేదీనే అభినయ్ కాలేజీలో చేరాడు. కాగా, తనకు కొత్త వీడియో గేమ్ కొనివ్వమని వారం రోజులుగా తండ్రిని అడుగుతున్నాడు. తండ్రి వాయిదా వేస్తూ వస్తున్నారు. ఆదివారం అభినయ్ మరోసారి తన తండ్రిని వీడియో గేమ్ కొనివ్వమని అడిగాడు. ఇల్లు కట్టడానికి చాలా డబ్బు ఖర్చయిందని, వీడియో గేమ్ తరవాత కొనిస్తానని తండ్రి చెప్పాడు. అయితే తనకు ఇప్పుడే వీడియో గేమ్ కొనివ్వాలని తండ్రితో వాదించాడు. కోపంతో తల్లిదండ్రులు అభినయ్‌ను మందలించారు. దీంతో తీవ్ర మనస్తాపానికి గురైన అభినయ్ టెర్రస్ పైకి వెళ్లి మెట్ల వద్ద తలుపును మూసేశాడు. అనంతరం పై నుంచి దూకేశాడు.

రక్తపు మడుగులో పడిఉన్న కొడుకుని హుటాహుటిన ఎల్బీ నగర్‌లోని కామినేని ఆసుపత్రికి తరలించారు. అయితే అప్పటికే అభినయ్ మరణించినట్లు డాక్టర్లు నిర్ధారించారు. కుటుంబసభ్యులు ఇచ్చిన ఫిర్యాదుతో పోలీసులు కేసు నమోదు చేసుకున్నారు. పోస్టుమార్టం అనంతరం అభినయ్ మృతదేహాన్ని కుటుంబ సభ్యులకు అప్పగించారు.