పోలీసు తప్పిదానికి బలైన యువతి.. మరో ఆరుగురిలో సజీవం

ప్రజలను కాపాడాల్సిన పోలీసు అధికారే మద్యం మత్తులో వాహనం నడుపుతూ ఓ యువతి ప్రాణాలు బలిగొన్నాడు. బ్రెయిన్ డెడ్ (జీవన్మృతురాలు) అయిన ఆమె అవయవాలను ఉబికి వస్తున్న కన్నీటి మధ్యే ఆమె కుటుంబసభ్యులు మరో ఆరుగురికి అమర్చడానికి అంగీకరించి మానవత చాటుకున్నారు. విజయవాడలో మంగళవారం (ఏప్రిల్ 3) రాత్రి ఈ ఘటన చోటు చేసుకుంది.

చిన్నాబత్తుల మైత్రీ తేజస్విని (26) అనే యువతి చెన్నైలో సాఫ్ట్‌వేర్ ఇంజనీర్‌గా పనిచేస్తూ కుటుంబానికి ఆసరాగా ఉంది. ఇటీవలే సొంతింటికి వచ్చిన ఈమె మంగళవారం రాత్రి తన సోదరుడితో కలిసి బైక్‌పై వెళ్తుండగా కఠారి శ్రీనివాస్‌ అనే ఏఆర్‌ కానిస్టేబుల్‌ మద్యం మత్తులో బైక్‌పై అతి వేగంగా వచ్చి ఢీకొట్టాడు. ప్రమాదంలో తేజస్విని తలకు తీవ్ర గాయమైంది.

అపస్మారక స్థితికి చేరుకున్న తేజస్విని వెంటనే ఆసుపత్రికి తరలించారు. కానీ, అప్పటికే ఆమె బ్రెయిన్‌ డెడ్‌ అయ్యిందని వైద్యులు చెప్పారు. ఇక తమ తేజస్విని లేదని తెలిసి ఆ కుటుంబ సభ్యులు కన్నీరుమున్నీరుగా విలపించారు. తల్లి మరణించిన 6 నెలల్లోపే సోదరికి ఇలా తిరిగిరాని లోకాలకు వెళ్లిపోయిందంటూ తేజస్విని తమ్ముడు విలపించడం పలువురిని కంటతడి పెట్టించింది.

అతి తొందర్లో వివాహం చేసుకోవాల్సిన యువతి ఇలా విగతజీవిగా మారటంతో గుణదల ప్రాంతంలో విషాద ఛాయలు అలుముకున్నాయి. ఘటనపై స్పందించిన పోలీస్ కమిషనర్‌ సీసీటీవీ ఫుటేజ్‌ను పరిశీలించారు. ప్రమాదానికి కారణమైన కానిస్టేబుల్‌ను సస్పెండ్‌ చేశారు. జీవన్‌దాన్‌ ట్రస్టు ప్రతినిధులు బ్రెయిన్‌ డెత్‌కు గురైన తేజస్విని అవయవాలు దానం చేసేలా ఒప్పించేందుకు ఆమె కుటుంబ సభ్యులకు కౌన్సెలింగ్‌ ఇచ్చారు. సుదీర్ఘ సమయం తర్వాత వారు అందుకు అంగీకరించారు. ఊహించని ప్రమాదం కారణంగా అకాల మరణం చెందిన తేజస్విని.. ఇప్పుడు మరికొంత మందిలో సజీవంగా ఉంటూ జేజేలు అందుకోనుంది.