అప్పుల ఆరోపణలపై స్పందించిన విక్రమ్ గౌడ్

అప్పుల్లో కూరుకుపోయిన కారణంగానే మాజీ మంత్రి ముఖేష్ గౌడ్ తనయుడు విక్రమ్ గౌడ్ తనని తాను కాల్చుకుని సూసైడ్ డ్రామా ఆడుతున్నాడని వస్తున్న ఆరోపణలపై స్వయంగా విక్రమ్ గౌడ్ స్పందించారు. అప్పుల బాధల్లో వున్న మాట వాస్తవమే కానీ తనకి బయటి నుంచి రావాల్సి వున్న డబ్బులు కూడా అంతే మొత్తంలో వున్నాయని అన్నారు ప్రస్తుతం ఆస్పత్రిలో చికిత్స పొందుతున్న విక్రమ్ గౌడ్. బయటి రాష్ట్రాల్లో మైనింగ్ బిజినెస్ నిర్వహిస్తున్న తనకి అక్కడ రావాల్సి వున్న డబ్బులతో అప్పులు తీర్చేయవచ్చని అన్నారు విక్రమ్. అయితే, అదేమీ పట్టించుకోని అప్పులోళ్లు మాత్రం ఈ పరిస్థితుల్లోనూ తనని కలవడం కోసం తాను చికిత్స పొందుతున్న ఆస్పత్రి చుట్టూ తిరుగుతున్నారు అని ఆవేదన వ్యక్తంచేశారు విక్రమ్.

తనపై హత్యాయత్నానికి పాల్పడిన వారిని విడిచిపెట్టొద్దని, వారిపై చట్టరీత్యా చర్యలు తీసుకోవాలని విక్రమ్ గౌడ్ పోలీసులకి విజ్ఞప్తిచేశారు. ఇదిలావుంటే, కాల్పుల ఘటనలో గాయపడిన విక్రమ్ గౌడ్ ఆస్పత్రిలో చికిత్స పొందుతుంటే, అతడి తండ్రి, మాజీ మంత్రి ముఖేష్ గౌడ్ మాత్రం దీనిపై స్పందించడానికి సుముఖత వ్యక్తంచేయడంలేదు. ఘటన జరిగినప్పటి నుంచి మీడియాలో రకరకాల కథనాలు వెలువడుతున్నప్పటికీ, ముఖేష్ గౌడ్ మాత్రం ముఖం చాటేసినట్టుగానే మీడియాకు దూరంగా వుంటున్నారు.