రాత్రికి రాత్రే విశ్వనగరాలు కావు: కేటీఆర్

హైదరాబాద్‌ను విశ్వనగరంగా తీర్చిదిద్దడానికి ప్రభుత్వం కట్టుబడి ఉందని, అందుకనుగుణంగా కృషి చేస్తున్నామని ఐటీ, పురపాలక శాఖ మంత్రి కేటీఆర్ అన్నారు. మంగళవారం (నవంబర్ 14) శాసనమండలిలో ప్రశ్నోత్తరాల సందర్భంగా సభ్యులు అడిగిన ప్రశ్నలకు మంత్రి సమాధానం ఇచ్చారు. ఈ సందర్భంగా ఆయన మాట్లాడుతూ.. రాత్రికి రాత్రే విశ్వనగరాలు తయారు కావని స్పష్టం చేశారు. నగరంలో రోడ్ల అభివృద్ధికి సమగ్ర ప్రణాళిక రూపొందించామని కేటీఆర్ చెప్పారు. జీహెచ్‌ఎంసీలో అభివృద్ధి పనులు చురుగ్గా కొనసాగుతున్నాయని తెలిపారు. జీహెచ్‌ఎంసీ మీద భారం పడకుండా లక్ష ఇండ్లు కట్టబోతున్నామని, వాటి కోసం రూ. 8,650 కోట్లు కేటాయించామని చెప్పారు.

హైదరాబాద్ నగరంలో మంచి నీటి కొరత లేకుండా చేశామని కేటీఆర్ స్పష్టం చేశారు. మంచినీటి సరఫరా విషయంలో ప్రభుత్వం పకడ్బందీ చర్యలు తీసుకుంటుందని స్పష్టం చేశారు. మెట్రో వాటర్ బోర్డు పనుల్లో జాప్యం లేదని చెప్పారు. జీహెచ్‌ఎంసీ పరిధిలో గత ఏడాది కాలంగా రూ. 1000 కోట్లు ఖర్చు చేశామని కేటీఆర్ తెలిపారు.