ఏంటి... కలెక్టర్ అమ్రపాలి ఇలా చేశారా?!!

ప్రజలతో మమేకమవుతూ అతి తక్కువ కాలంలోనే తనకంటూ ప్రత్యేక గుర్తింపు తెచ్చుకున్న కలెక్టర్ ఆమె. సోషల్ మీడియాలో ఆమె ఎప్పుడూ యాక్టివ్‌గా ఉంటారు. కలెక్టర్‌ హోదాలో ఆమె తీసుకునే నిర్ణయాలతో అడవుల్లో షికార్లు చేయడం, రాక్ క్లైంబింగ్ చేయడం ఇలా.. ఆమె ఏం చేసినా విశేషమే. తనదైన శైలిలో విధులు నిర్వహిస్తూ ప్రజల మన్ననలు అందుకున్న ఈ యువ కలెక్టర్ గణతంత్ర వేడుకల్లో వ్యవహరించిన తీరుపై మాత్రం విమర్శలు గుప్పిస్తున్నారు. ఆమె ఎవరో కాదు వరంగల్ అర్బన్ జిల్లా కలెక్టర్, యువ ఐఏఎస్ అధికారిణి ఆమ్రపాలి. గణతంత్ర వేడుకల్లో జెండా వందనం చేశాక ఆమె చేసే ప్రసంగం జిల్లా అభివృద్ధి ప్రణాళికకు అద్దం పట్టాలి. కానీ ఎంతో హుందాగా.. అందంగా సాగాల్సిన కార్యక్రమం అభాసుపాలు కావడంతో చర్చనీయాంశమైంది.

దీనిపై సామాజిక మాధ్యమాల్లో విమర్శలు గుప్పుమంటున్నాయి. ఆమె తన ప్రసంగం మధ్యలో అదేపనిగా.. నవ్వడం.. గణాంకాల వెల్లడి దగ్గర తడబడటం.. మధ్యలో ‘ఇట్స్ ఫన్నీ’ అని వ్యాఖ్యానించడమే దీనికి కారణం. హన్మకొండ పోలీసు పరేడ్‌ మైదానంలో జాతీయ పతాకాన్ని ఎగరవేసిన కలెక్టర్ అమ్రపాలి అనంతరం తన ప్రసంగ పాఠాన్ని చదువుతూ పలుమార్లు తడబడ్డారు. మధ్యమధ్యలో అసందర్భంగా నవ్వారు. మరుగుదొడ్ల నిర్మాణంలో ప్రగతి గురించి ప్రస్తావన వచ్చినపుడు ఏకంగా వెనక్కి తిరిగి నవ్వుకుంటూ తనలోతాను ‘ఇట్స్ ఫన్నీ’ అని వ్యాఖ్యానించారు. ఈ తతంగమంతా మైకుల ద్వారా ప్రసారం కావడంతోపాటు సామాజిక మాధ్యమాల్లో ఆ ఈ దృశ్యాలు హల్‌చల్ చేస్తున్నాయి.