అమ్రపాలి రిసెప్షన్.. హాజరైన మంత్రులు

వరంగల్‌ అర్బన్‌ జిల్లా కలెక్టర్‌ అమ్రపాలి వివాహం ఫిబ్రవరి 18 న ఐపీఎస్ అధికారి సమీర్‌శర్మతో జమ్మూలో జరిగిన విషయం తెలిసిందే. అమ్రపాలి 2010 బ్యాచ్ ఐఏఎస్ ఆఫీసర్ కాగా, సమీర్ శర్మ 2011 బ్యాచ్‌కు చెందిన ఐపీఎస్ అధికారి. ఆమ్రపాలి- సమీర్ శర్మల రిసెప్షన్ ఆదివారం హైదరాబాద్‌లో జరిగింది. ఈ రిసెప్షన్‌కు పలువురు తెలంగాణ మంత్రులు హాజరయ్యారు. ఉప ముఖ్యమంత్రి కడియం శ్రీహరి, రోడ్లు భవనాల శాఖ మంత్రి తుమ్మల నాగేశ్వరరావు, రవాణాశాఖ మంత్రి మహేందర్‌రెడ్డి, ఎమ్మెల్సీ యాదవరెడ్డి హాజరై నూతన దంపతులను ఆశీర్వదించారు.


రెండు రోజుల కిందట కలెక్టర్‌ అమ్రపాలి - సమీర్‌ శర్మ వివాహ విందు వరంగల్‌లో అంగరంగ వైభవంగా జరిగింది. కలెక్టరేట్‌ లోని క్యాంప్‌ కార్యాలయంలో జరిగిన విందుకు ప్రజా ప్రతినిధులు, ఉన్నతాధికారులతో సహా సుమారు 600 మంది హాజరయ్యారు. ఈ సందర్భంగా వరంగల్‌ సంగీత, నృత్య కళాశాల విద్యార్థులు ప్రదర్శించిన సాంస్కృతిక కార్యక్రమాలు అలరించాయి. విందుకు ఎంపీ కెప్టెన్‌ లక్ష్మీకాంతారావు, ఎమ్మెల్యేలు ఎర్రబెల్లి దయాకర్‌ రావు, దాస్యం వినయ్‌ భాస్కర్‌, చల్లా ధర్మారెడ్డి హాజరయ్యారు.