బస్సులో మంటలు, చూస్తుండగానే దగ్ధం.. ఔటర్‌పై ఘటన వీడియో

ప్రైవేట్ ట్రావెల్స్‌కు చెందిన ఓ బస్సు అకస్మాత్తుగా మంటలు చెలరేగి చూస్తుండగానే దగ్ధమైంది. ఈ ఘటన హైదరాబాద్ ఔటర్ రింగ్ రోడ్డుపై చోటుచేసుకుంది. ఓఆర్‌ఆర్‌పై నార్సింగి పోలీస్ స్టేషన్ పరిధిలోని కోకాపేట్ ఎగ్జిట్ వద్ద సోమవారం (జులై 8) ఉదయం ఈ ప్రమాదం జరిగింది. ఈ ఘటనలో భూమా ట్రావెల్స్‌కు చెందిన బస్సు పూర్తిగా కాలిపోయింది. ఇంజన్‌లో లోపంతో మంటలకు చెలరేగినట్లు తెలుస్తోంది. సమాచారం అందుకున్న పోలీసులు, ఫైర్ సిబ్బంది ఘటనా స్థలికి వచ్చి మంటలను ఆర్పేశారు.

ఇంజన్ నుంచి పొగలు రావడం గమనించిన డ్రైవర్.. వెంటనే బస్సును రోడ్డుకు ఓ పక్కగా నిలిపేసి కిందకి దిగాడు. చూస్తుండగానే బస్సు మొత్తం మంటలు వ్యాపించి దగ్ధమైంది. ఈ ఘటనతో ఔటర్‌పై కాసేపు ట్రాఫిక్ నిలిచిపోయింది. ఇంజన్‌లో షార్ట్ సర్క్యూట్ కారణంగానే మంటలు చెలరేగినట్లు తెలుస్తోంది.