వీడియో: భద్రాచలంలో గోదావరి ఉగ్రరూపం

ఖమ్మంలో భారీ వర్షాలు, ఎగువ ప్రాంతాల నుంచి వస్తున్న వరద నీటితో భద్రాచలం వద్ద గోదావరి ఉగ్రరూపం దాల్చింది. నీటి మట్టం క్రమంగా పెరుగుతూ.. ప్రమాదకర స్థాయిలో ప్రవహిస్తోంది. మంగళవారం (ఆగస్టు 22) సాయంత్రానికి భద్రాద్రి వంతెన వద్ద గోదావరి ప్రవాహం 53 అడుగులకు చేరుకోనుంది. ఇదే జరిగితే అధికారులు మూడో ప్రమాద హెచ్చరిక జారీ చేస్తారు. భద్రాచలం వద్ద హై అలర్ట్ విధించారు. తాలిపేరు ప్రాజెక్ట్ పూర్తి స్థాయి నీటి మట్టానికి చేరుకోవడంతో.. 25 గేట్లు ఎత్తి నీటిని కిందకి వదులుతున్నారు.

మంగళవారం రాత్రికి గోదావరి ప్రవాహం మరింత పెరిగే అవకాశం ఉంది. అధికారులు ప్రజలకు ఎప్పటికప్పుడు హెచ్చరికలు జారీ చేస్తున్నారు. పాల్వంచ డీఎస్పీ వి శ్రీనివాసులు వరద ప్రభావిత ప్రాంతాల్లో పర్యటించి పరస్థితిని సమీక్షించారు. వరదల్లో చిక్కుకున్న ప్రజలను సురక్షిత ప్రాంతాలకు తరలిస్తున్నారు.
అటు ధవళేశ్వరం బ్యారేజీ వద్ద అఖండ గోదావరి ఉధృతంగా ప్రవహిస్తోంది. కృష్ణా జిల్లాలో లంక గ్రామాలు నీటమునగడంతో ప్రజలు తీవ్ర ఇబ్బందులు ఎదుర్కొంటున్నారు. ఉభయ గోదావరి జిల్లాల్లోని పలు గ్రామాలకు బాహ్య ప్రపంచంతో సంబంధాలు తెగిపోయాయి.