వీడియో: చిన్నారిని చిదిమేసిన కారు..

బంధువుతో కలిసి కిరాణా కొట్టుకు వెళ్లిన ఓ చిన్నారిని వేగంగా దూసుకొచ్చిన కారు చిదిమేసిన ఘటన హైదరాబాద్‌లో చోటు చేసుకుంది. సరూర్‌నగర్‌ పరిధిలోని మాధవనగర్‌లో ఈ విషాదం జరిగింది. కూలీ పనులు చేసుకుంటూ కుటుంబాన్ని పోషిస్తున్న నగేష్ అనే వ్యక్తి స్థానికంగా నివాసం ఉంటున్నాడు. అతడికి 23 నెలల కుమారుడు జశ్వంత్ ఉన్నాడు. గురువారం (నవంబర్ 9) జశ్వంత్‌కు మామ అయ్యే యువకుడు వాళ్ల ఇంటికి వచ్చాడు. తన ముద్దుల అల్లుడికి ఏదైనా కొనిపెడదామని అతడు ముచ్చటపడి.. బాలుణ్ని సమీపంలోని కిరాణా కొట్టుకు తీసుకెళ్లాడు. అక్కడ ఆ చిన్నారికి చిప్స్ ప్యాకెట్ ఇప్పించాడు. అనంతరం అతడు డబ్బులు చెల్లిస్తుండగా.. చిన్నారి జశ్వంత్ ఆనందంతో ఇంటికి తిరిగెళ్లడానికి అకస్మాత్తుగా రోడ్డుపైకి వచ్చాడు.

అదే సమయంలో వచ్చిన ఓ కారు ఆ బాలుణ్ని ఢీకొట్టి కొద్ది దూరం ఈడ్చుకెళ్లింది. పక్కనే ఉన్న స్థానికుడు ఒకరు జశ్వంత్‌ను పైకి లేపాడు. కారు డ్రైవర్ కూడా వెంటనే అప్రమత్తమై వాహనాన్ని నిలిపేశాడు. గాయపడిన బాలుణ్ని అదే కారులో ఆసుపత్రికి తరలించారు. ఒకటి, రెండు ఆసుపత్రుల్లో ప్రాథమిక చికిత్స తర్వాత నీలోఫర్ ఆసుపత్రికి తీసుకెళ్లారు. అక్కడ చికిత్స పొందుతూ చిన్నారి జశ్వంత్.. మృత్యువాతపడ్డాడు.

బాలుడి తల్లిదండ్రులు కన్నీరుమున్నీరవుతున్నారు. కిరాణా షాపులోని సీసీటీవీ కెమెరాల్లో ఆ విషాదం తాలూకు దృశ్యాలు నమోదయ్యాయి.