వీడియో: సామీ.. నన్ను బెజవాడ దుర్గమ్మ ఆవహించింది!

సామీ... నన్ను విజయవాడ కనకదుర్గమ్మ ఆవహించింది.. తిరుపతి వెంకన్న సన్నిధిలో మోదీ హామీలు ఇచ్చి మరిచిపోయిండు.. తెలుగు ప్రజల ఆత్మగౌరవాన్ని కేంద్రం లెక్కచేయడం లేదు. పార్లమెంట్‌ సాక్షిగా హెచ్చరిస్తున్నా. ఏపీలో కాంగ్రెస్‌కు పట్టిన గతే.. బీజేపీ కూడా పడుతుంది.. చిత్తూరు ఎంపీ శివప్రసాద్ ఆక్షేపణ ఇది. ఆంధ్రప్రదేశ్‌ పట్ల బీజేపీ తీరును నిరసిస్తూ పార్లమెంట్ ఆవరణలో టీడీపీ ఎంపీలు శుక్రవారం (ఫిబ్రవరి 9) ఆందోళన నిర్వహించారు. ఈ సందర్భంగా ఎంపీ శివప్రసాద్‌ వినూత్న వేషధారణలో నిరసన చేపట్టి మరోసారి అందరి దృష్టిని ఆకర్షించారు.

పార్లమెంట్‌ ఆవరణలోని గాంధీ విగ్రహం వద్ద ఆందోళన నిర్వహించిన టీడీపీ ఎంపీలు.. వెంకటేశ్వర స్వామి పాదాల సాక్షిగా మోదీ ఇచ్చిన హామీలు నెరవేర్చాలని డిమాండ్‌ చేశారు. ఏపీకి న్యాయం చేయాలంటూ పెద్ద ఎత్తున నినాదాలు చేశారు.

మరోవైపు.. ఆంధ్రప్రదేశ్‌కు న్యాయం చేయాలంటూ ఏపీ ఎంపీల ఆందోళనతో లోక్‌సభ అట్టుడికింది. పార్లమెంట్‌లో ఇచ్చిన హామీలను నెరవేర్చాలని నినాదాలు చేస్తూ.. టీడీపీ, వైసీపీ ఎంపీలు స్పీకర్‌ పోడియం చుట్టుముట్టి నిరసన చేపట్టారు. సభ్యులు శాంతించకపోవడంతో స్పీకర్‌ సుమిత్రా మహాజన్‌ సభను మార్చి 5కు వాయిదా వేశారు.