2019లో అధికారం మాదే: ఉత్తమ్ కుమార్ రెడ్డి

కేసీఆర్ మూడేళ్ల పాలనలో కోటి రతనాల వీణ తెలంగాణను అప్పుల తెలంగాణగా, ఆత్మహత్యల తెలంగాణగా మార్చారని టీపీసీసీ అధ్యక్షుడు ఉత్తమ్ కుమార్ రెడ్డి ఆరోపించారు. కేంద్రంలో మోదీ, తెలంగాణలో కేసీఆర్ పాలనకు మూడేళ్లు ముగిసిన సందర్భంగా తెలంగాణ కాంగ్రెస్ ఆధ్వర్యంలో సంగారెడ్డిలో ప్రజాగర్జన పేరుతో భారీ బహిరంగ సభ జరిగింది. ఈ సభకు ముఖ్యఅతిథిగా కాంగ్రెస్ ఉపాధ్యక్షుడు రాహుల్ గాంధీ హాజరయ్యారు.

ఈ సందర్భంగా ఉత్తమ్ కుమార్ రెడ్డి మాట్లాడుతూ కోటి రతనాల వీణ తెలంగాణను కేసీఆర్ పాలనలో అప్పుల తెలంగాణ, ఆత్మహత్యల తెలంగాణగా మార్చారని ఆరోపించారు. మోదీ పాలనలో దేశప్రజలు ఎన్నో ఇబ్బందులకు గురయ్యారని విమర్శించారు. హామీల వర్షం కురిపించి అధికారంలోకి వచ్చిన కేసీఆర్...వాటిని విస్మరించి రాజ్యమేలుతున్నారని మండిపడ్డారు.

2019లో తెలంగాణలో అత్యధిక స్థానాలు గెలిచి అధికారంలోకి వస్తామని ఆయన ధీమా వ్యక్తం చేశారు.