నా భర్త ఎక్కడ?: పోలీసులతో కోదండరాం భార్య

బుధవారం తెల్లవారు జామున 3.30గంటలకు అరెస్టయిన టీజేఏసీ చైర్మన్ ప్రొ.కోదండరాం ఆచూకీ ఇంత వరకు తెలిదని ఆయన సతీమణ సుశీల అన్నారు. తన భర్తకు ఆచూకీ తెలపాలని ఆమె హైదరాబాద్ కమిషనర్ మహేందర్ ను కలిశారు.

‘సంఘ విద్రోహ శక్తులు పాల్గొంటున్నాయని నిరుద్యోగ ర్యాలీని అడ్డుకుంటున్నారు. అలాంటప్పుడు తెలంగాణ ఉద్యమానికి కూడా మద్దతుగా నిలిచింది ఆ సంఘవిద్రోహ శక్తులేనా?’’ అంటూ ఆమె ప్రశ్నించారు.

ఉదయం 6గంటలకు బయటకి వస్తానని, అప్పుడు అరెస్టు చేయండి అని కోదండరామ్ చెప్పినా పోలీసులు తలుపు బద్దలుకొట్టి మరీ ఇంట్లోకి చొరబడి అరెస్టు చేశారని సుశీల ఆరోపించారు. దొంగ, దోపిడీదారులతో వ్యవహరించినట్లుగా ప్రొఫెసర్ అయిన తన భర్త పట్ల పోలీసులు అమానుషంగా ప్రవర్తించారని అమె ఆవేదన వ్యక్తం చేశారు.

తెలంగాణలోని అన్ని ప్రభుత్వ శాఖల్లో ఉద్యోగఖాళీలపై నోటిఫికేషన్ విడుదల చేయాలని ఆమె డిమాండ్ చేశారు.

ఇదిలా ఉండగా కోదండరాంను అరెస్టు చేసి ఎక్కడ ఉంచారో ఆచూకీ తెలియదని జేఏసీ తరపున హైకోర్టులో వాదించిన అడ్వకేట్ రచనా రెడ్డి అన్నారు.