​ఎన్టీఆర్ కు టీడీపీని పెట్టమని చెప్పిందెవరో తెలుసా?!

తెలుగుదేశం పార్టీ.. ఆంధ్రప్రదేశ్ రాజకీయంలో సంచలనం. దశాబ్దాల పాటు కాంగ్రెస్ పాలనలో ఉండిన రాష్ట్రంలో ఆవిర్భావంతోనే సంచలనం సృష్టించింది తెలుగుదేశం పార్టీ. సినీ నటుడు పెట్టిన పార్టీగా, ఆవిర్భవించిన తొమ్మిది నెలల్లోనే అధికారాన్ని సాధించుకున్న ప్రాంతీయ పార్టీగా తెలుగుదేశం పార్టీ సంచలనం సృష్టించింది. ఆ తర్వాత ఆ పార్టీలో అనేక పరిణామాలు చోటు చేసుకున్నాయి. తిరుగుబాట్లు, ఎన్టీఆర్ మరణం, ఆ తర్వాత తొమ్మిదేళ్ల పాటు అధికారం, మరో పదేళ్ల ప్రతిపక్ష వాసం.. ప్రస్తుతం ఏపీలో అధికారంలో ఉంది టీడీపీ.

మరి ఇలాంటి పార్టీ తాజాగా ఆవిర్భావ దినోత్సవాన్ని పూర్తి చేసుకుంది. ఈ కార్యక్రమంలో పాల్గొన్న టీడీపీ అధినేత చంద్రబాబు నాయుడు ఆసక్తికరమైన వ్యాఖ్యలు చేశారు. ఇంతకీ బాబు ఏమన్నారంటే.. తెలుగుదేశం పార్టీని పెట్టమని ఎన్టీఆర్ కు సలహా ఇచ్చింది తనే అని అన్నారు. సినిమాలతో కాలం గడిపేస్తున్న ఎన్టీఆర్ ను రాజకీయాల్లోకి రమ్మని చెప్పింది తనేనని బాబు అన్నారు. తన సూచన మేరకే ఎన్టీఆర్ తెలుగుదేశం పార్టీని ఏర్పాటు చేశారని బాబు అన్నారు.

ఆసక్తికరమైన విషయం ఏమిటంటే.. తెలుగుదేశం ఆవిర్భావ సమయానికి చంద్రబాబు నాయుడు కాంగ్రెస్ పార్టీలో ఉన్నారు. ఆ పార్టీ తరపున మంత్రిగా ఉన్నారు. అయితే తెలుగుదేశం పార్టీ ఆవిర్భావానికి తన సలహానే కారణమని బాబు అంటున్నారు.