తెలుగు మహాసభలు.. వీరికి ఆహ్వానాలేవి?: కాంగ్రెస్

ప్రపంచ తెలుగు మహాసభలకు ఆతిథ్యం ఇవ్వడానికి భాగ్యనగరం ముస్తాబవుతోంది. డిసెంబర్ 15 నుంచి 19వ తేదీ వరకు ఈ సభలను ఘనంగా నిర్వహించేలా తెలంగాణ సర్కారు కార్యచరణ రూపొందించింది. శుక్రవారం సాయంత్రం ఐదు గంటలకు ఎల్బీ స్టేడియంలోని బమ్మెర పోతన వేదికపై ఈ వేడుకలు ప్రారంభం అవుతాయి. ప్రతిష్టాత్మక తెలుగు మహాసభల్లో పాల్గొనడానికి తెలంగాణ కవులకు ఆహ్వానం అందకపోవడం పట్ల కాంగ్రెస్ పార్టీ మండిపడింది.

అందెశ్రీ, గోరేటి వెంకన్న, విమలక్క, తిరుమల రావు, జయ భీమ్ లాంటి వారిని తెలుగు మహాసభలకు ఆహ్వానించక పోవడాన్ని తప్పుబట్టింది. ఈ మహాసభలు తెలంగాణను కించపరిచేలా ఉన్నాయని, కేసీఆర్ ఆలోచనా ధోరణికి అద్దం పడుతున్నాయని విమర్శించింది. తెలంగాణ ఉద్యమ సమయంలో చురుగ్గా వ్యవహరించిన వారికి ఆహ్వానం దక్కకపోవడం ఏంటని.. తెలంగాణ కాంగ్రెస్ పార్టీ ముఖ్య అధికార ప్రతినిధి దాసోజు శ్రవణ్ ప్రశ్నించారు.

తెలంగాణ సాహిత్య వికాసానికి కృషి చేసిన వారికి ఆహ్వానం పంపలేదు. కానీ అమెరికా, ఆస్ట్రేలియా లాంటి దేశాల్లో ఉంటున్న కొందరు కవులకు మాత్రం వెండి పళ్లెల్లో ఆహ్వానాలు పంపారంటూ శ్రవణ్ మండిపడ్డారు. తెలుగు మహాసభల పేరిట తన ప్రతిష్టను పెంచుకోవడానికి కేసీఆర్ రూ. 50 కోట్ల ప్రజాధనాన్ని వృధా చేస్తున్నారని ఆరోపించారు. కేసీఆర్ పాలనలో 4 వేల మంది రైతులు బలవన్మరణాలకు పాల్పడ్డారన్న ఆయన టీఆర్ఎస్ పాలనను విమర్శించారు.