కన్నతల్లి కర్కశత్వం.. పదో కాన్పులోనూ ఆడబిడ్డేనని ఏడ్చినా పాలివ్వలేదు

అప్పటికే తొమ్మిది సంతానం ఉండగా, వీరిలో ఆరుగురు అమ్మాయిలు, ముగ్గురు అబ్బాయిలు. మరో అబ్బాయి కోసం ప్రయత్నించిన ఓ జంట, పదో కాన్పులోనూ ఆడపిల్లే పుట్టడంతో ఆ శిశువును వదిలించుకునే ప్రయత్నం చేశారు. నవజాత శిశువుకు శత్రువులుగా మారిపోయి, బిడ్డ ఎలా ఉందో చూసేందుకు కన్న తల్లిదండ్రులు సహా కుటుంబ సభ్యులెవరూ రాలేదు. అంతేకాదు, గుక్కపట్టి ఏడుస్తున్నా పాలివ్వడానికి ఆ కసాయి తల్లి నిరాకరించింది. హృద‌య‌విదారకమైన ఈ ఘటన నల్గొండ జిల్లా దేవరకొండ ప్రభుత్వాసుపత్రిలో మంగళవారం చోటుచేసుకుంది.

చందంపేట మండలం మోత్య తండాకు చెందిన ఇస్లావత్ సావిత్రి-రాజు భార్యాభర్తలు. వీరికి ఇప్పటికే 9 మంది పిల్లలున్నారు. మరో బిడ్డ కోసం ప్రయత్నించగా, మంగళవారం ఉదయం సావిత్రి దేవరకొండ ప్రభుత్వ హాస్పిటల్‌లో పదో సంతానానికి జన్మనిచ్చింది. కానీ, ఆడపిల్ల పుట్టిందని తెలుసుకున్న ఆ దంపతులు ఆ బిడ్డను చూసేందుకు సైతం నిరాకరించారు. చిన్నారి గక్కపట్టి ఏడుస్తున్నా శిలలాంటి ఆ తల్లి మనసు చలించలేదు. ఆ బిడ్డ ఏడుపునకు చలించిపోయిన చుట్టుపక్కలవారు వారిని మందలించి, పాలుపట్టాలని చెప్పినా ఆ తల్లి మనసు కరగలేదు. దీంతో వారే పోతపాలు పట్టి చిన్నారి ఆకలి తీర్చారు.

ఇదిలా ఉండగా, ఆ శిశువును గుట్టుచప్పుడు కాకుండా విక్రయించేందుకు సావిత్రి, రాజులు చేస్తున్న ప్రయత్నాల గురించి తెలుసుకున్న ఐసీడీఎస్ సూపర్‌వైజర్ వెంకటమ్మ ఆసుపత్రికి చేరుకుని వారిని మందలించారు. చిన్నారి కనిపించకపోయినా, ఏదైనా జరిగినా కఠిన చర్యలు తప్పవని హెచ్చరించారు. దీంతో బిడ్డ తండ్రి రాజు వెంకటమ్మతో వాగ్వివాదానికి దిగి, ఆగ్రహం వ్యక్తం చేశాడు. కేసుకాదు, ఇంకేమైనా చేసుకోండి అంటూ ఎదురుదాడికి దిగాడు. అయితే, చివరికి పోలీసుల జోక్యంతో చిన్నారిని ఇంటికి తీసుకెళ్లేందుకు వారు అంగీకరించారు.