జూబ్లీ ప్రమాదం.. మరో యువతి బ్రెయిన్ డెడ్

శనివారం రాత్రి హైదరాబాద్‌లోని జూబ్లీహిల్స్‌లో మద్యం సేవించిన ఓ వ్యక్తి తన కారుతో ద్విచక్ర వాహనాన్ని ఢీకొట్టిన ఘటనలో తాడేపల్లిగూడెంకు చెందిన ఓ యువతి మృతి చెందిన విషయం తెలిసిందే. ఈ ఘటనలో తీవ్రంగా గాయపడిన ఇద్దరు యువతిల్లో అనూష అనే అమ్మాయి బ్రెయిన్ డెడ్ అయినట్లు వైద్యులు ప్రకటించారు. విష్ణువర్ధన్ అనే వ్యక్తి మద్యం తాగి కారు నడుపుతూ ద్విచక్ర వాహనాన్ని ఢీకొట్టగా ఘటనా స్థలిలోనే మస్తానీ అనే యువతి అక్కడికక్కడే మరణించగా, అనూషతో పాటు గాయపడిన ప్రియ ప్రస్తుతం ఆసుపత్రిలో చికిత్స పొందుతున్నారు. ఈ ముగ్గురూ కలిసి టూ వీలర్‌పై వస్తుండగా, 'టీఎస్ 09 ఈవీ 7707' నెంబర్ గల కారులో వచ్చిన విష్ణువర్ధన్ ఢీకొట్టాడు. మస్తానీ తన స్నేహితురాళ్లను స్కూటీపై ఇంటికి తీసుకెళ్తున్న సమయంలో ఈ ప్రమాదం చోటుచేసుకుంది.

ఈ ప్రమాదం తర్వాత అక్కడ నుంచి తప్పించుకునే ప్రయత్నంలో విష్ణువర్ధన్ వేగంగా కారు నడుపుతూ డివైడర్‌ను ఢీకొట్టినట్లు పోలీసులు తెలిపారు. నిందితుడు తమ అదుపులోనే ఉన్నాడని, అతడికి కఠిన శిక్ష పడేలా చూస్తామని పోలీసు అధికారులు తెలిపారు. మద్యం తాగి వాహనాలు నడపొద్దని ఎంతగా మొత్తుకుంటున్నా, మందుబాబులు మాత్రం పెడచెవిన పెడుతున్నారు. తాగి వాహనం నడిపి ప్రమాదాలబారిన పడటమే కాదు, ఎదుటివారి ప్రాణాలను తీస్తున్నారు. వీరి చర్యల కారణంగా అమాయకులు సైతం మృత్యువాత పడుతున్నారు.