అత్తతో గొడవ.. ఆమె మరణ వార్త విని కోడలు మృతి

చిన్న విషయానికే వాగ్వాదం.. క్షణికావేశంలో పురుగుల మందు తాగిన అత్త.. ఆమె మరణవార్త విని కుప్పకూలి మృతి చెందిన కోడలు. కర్నూలు జిల్లా బండి ఆత్మకూర్‌లో ఆదివారం (డిసెంబర్ 2) మధ్యాహ్నం చోటుచేసుకున్న విషాదమిది. కుటుంబ కలహాలతో అత్తాకోడళ్లు ఒకరి వెంట ఒకరు వరసగా మృతి చెందడం స్థానికంగా సంచలనంగా మారింది. పోలీసులు, స్థానికులు తెలిపిన వివరాల ప్రకారం..

బండి ఆత్మకూర్ మండలంలోని సోమయాజుల పల్లె గ్రామానికి చెందిన కళావతి (48), వెంకట లక్ష్మి (28) అత్తాకోడళ్లు. కుటుంబ కలహాల నేపథ్యంలో గత కొంత కాలంగా వీరిద్దరి మధ్య భేదాభిప్రాయాలున్నట్లు తెలుస్తోంది. ఈ క్రమంలో ఆదివారం చిన్న వాగ్వాదం చోటుచేసుకుంది.

అత్తాకోడళ్ల మధ్య గొడవ ముదరడంతో క్షణికావేశంలో అత్త కళావతి పురుగుల మందు తాగారు. వెంటనే అప్రమత్తమైన కుటుంబ సభ్యులు ఆమెను నంద్యాల ప్రభుత్వాసుపత్రికి తరలించారు. అక్కడ చికిత్స పొందుతూ ఆమె మృతి చెందారు. అత్త మరణ వార్త విన్న కోడలు వెంకట లక్ష్మి (28) ఒక్కసారిగా స్పృహ కోల్పోయారు. వెంటనే స్థానికులు ఆమెను ఆసుపత్రికి తరలించారు. అక్కడ చికిత్స పొందుతూ ఆమె కూడా మృతి చెందారు. కేసు నమోదు చేసుకొని, దర్యాప్తు చేస్తున్నట్లు పోలీసులు వెల్లడించారు.