పామును పచ్చడిగా నూరేసిన మహిళ..!

రోట్లో పడుకున్న పామును చూడకుండా.. టమాటాలతో కలిపి పచ్చడిగా నూరేసింది ఓ మహిళ. పచ్చడి.. భలే ఉందంటూ.. ఆ కుటుంబ సభ్యులు మళ్లీ మళ్లీ వేసుకొని లొట్టలేసుకుంటూ తిన్నారు. చివర్లో ఒక వ్యక్తి అందులో పాము తోక ఉన్నట్లు గుర్తించడంతో.. వారందరూ లబోదిబోమంటూ ఆసుపత్రికి పరుగెత్తారు. వనపర్తి జిల్లా.. ఖిలా ఘనపురం మండలం మానాజీపేటలో చోటు చేసుకున్న ఈ ఘటన వివరాలిలా ఉన్నాయి.. గొల్ల రాజమ్మ అనే మహిళ టమాటా చట్నీ చేయడానికి అన్నీ సిద్ధం చేసుకొని, ఇంటి వెనకాల ఉన్న పెద్ద రోట్లో వాటిని వేసేసింది. అయితే.. పని తొందర్లో అప్పటికే అందులో ఓ పాము నిద్రపోతుండటాన్ని గమనించలేకపోయింది. ఇంకేం.. టమాటాలతో పాటు ఆ పాము కూడా పచ్చడిగా మారిపోయింది.

ఆ తర్వాత కుటుంబ సభ్యులందరూ కలిసి భోజనానికి కూర్చున్నారు. పచ్చి మిరపకాయలతో కలిపి రోట్లో నూరిన పచ్చడి కావడంతో.. టమాటా పచ్చడి భలే టేస్టీగా ఉందంటూ.. ప్లేట్లు, చేతులను కూడా నాకేస్తూ పుష్టిగా తిన్నారు. ఆ తర్వాత గొర్రెల మందతో బయటికెళ్లిన మరో కుటుంబ సభ్యుడు సాయి కోసం సద్ది పట్టుకెళ్లారు.

పచ్చడి కలుపుకొని ఆబగా కొన్ని ముద్దలు తిన్నాక సాయికి అందులో పాము తోకకు సంబంధించిన ఓ ముక్క కనిపించింది. ఇదేమిటా.. అని జాగ్రత్తగా పరీక్షించి చూస్తే.. పాముకు చెందిన కొన్ని అవశేషాలు కనిపించడంతో అతడికి వాంతికొచ్చినంత పనైంది. పరుగుపరుగున ఇంటికెళ్లిన సాయి.. అమ్మ చేసిన ఘనకార్యం గురించి కుటుంబ సభ్యులకు చెప్పాడు. దీంతో వారంతా ఆందోళనతో మహబూబ్‌నగర్ జిల్లా ఆసుపత్రి బాట పట్టారు. ప్రస్తుతం వారి ఆరోగ్యం నిలకడగా ఉంది.