హయత్‌నగర్‌: యువతి దారుణ హత్య

హైదరాబాద్ శివారులోని హయత్‌నగర్‌లో దారుణం జరిగింది. ఒంటరిగా ఉంటూ పోలీస్ కానిస్టేబుల్ ఉద్యోగాలకు సన్నద్ధమవుతున్న అనూష అనే యువతి అత్యంత దారుణంగా హత్యకు గురైంది. ఆమె తలపై బండరాయితో కొట్టి హత్య చేశారు. అనుషా స్వస్థలం నల్లగొండ జిల్లాలోని దేవరకొండ. 2016లో బీటెక్ పూర్తి చేసిన అనూష.. కొంతకాలంగా నగరంలో ఉంటూ ప్రభుత్వ ఉద్యోగాలకు ప్రిపేర్ అవుతోంది.

మోతీలాల్ అనే వ్యక్తే ఈ దారుణానికి ఒడిగట్టాడని అనూష కుటుంబసభ్యులు ఆరోపిస్తున్నారు. నాలుగు నెలల కిందట అతడితో అనూషకు పెళ్లి నిశ్చితార్థం జరిగిందని, ఆ తర్వాత అతడి తీరు నచ్చక పెళ్లి రద్దు చేసుకున్నామని అనూష బంధువులు చెబుతున్నారు.

తనకు దక్కని అనూష ఎవరికీ దక్కకూడదనే ఉద్దేశంతోనే మోతీలాల్ ఈ దారుణానికి ఒడిగట్టాడని ఆమె కుటుంబసభ్యులు ఆరోపిస్తున్నారు. జనవరి 26 సందర్భంగా వరస సెలవుల నేపథ్యంలో అనూష ఇంటికి రావల్సి ఉందని.. అయితే మోతీలాల్‌కు భయపడే స్వగ్రామానికి రాలేదని వారు తెలిపారు. ఘటనపై కేసు నమోదు చేసుకున్న పోలీసులు దర్యాప్తు చేస్తున్నారు.