సిగరెట్ తాగొద్దన్నందుకు మహిళా కండక్టర్ పై దాడి

ఓ దుండగుడు మహిళ కండక్టర్ పై అందరూ చూస్తుండగానే దాడి చేశాడు. బస్సులో సిగరెట్ తాగుతున్న వ్యక్తిని వద్దని చెప్పడమే ఆమె చేసిన పాపం. ఆమెపై పిడిగుద్దులు కురిపించి బస్సు దిగి పారిపోయాడు ఆ గుర్తు తెలియని వ్యక్తి. ఈ ఘటనలో మహిళా కండక్టర్ కంటికి తీవ్ర గాయమైంది. హైదరాబాద్ శివారులోని మల్లేపల్లి చౌరస్తా వద్ద మంగళవారం ఈ ఘటన జరిగింది. ఫలక్ నుమా బస్ డిపోకు చెందిన 87 నెంబర్ బస్సు మెహిదీపట్నం నుంచి చార్మినార్ వెళుతోంది. అందులో మహిళా కండక్టర్ సునీత విధుల్లో ఉంది.

ఓ ప్రయాణికుడు బస్సు ఎక్కి ఫుట్ పాత్ పై ప్రయాణం చేస్తున్నాడు. బస్సు ఎక్కాక సిగరెట్ తాగుతున్నాడు. బస్సులో సిగరెట్ తాగడం నిషేధం. ప్రమాదాలు జరిగే అవకాశం ఉంటుంది. అందుకే కండక్టర్ సునీత సిగరెట్ తాగవద్దని సదరు ప్రయాణికుడికి చెప్పింది. అయినా అతను వినకుండా అదేపని చేస్తుండడంతో బస్సు దిగమని చెప్పింది. దీంతో ఆగ్రహంతో ఊగిపోయిన ఆ ప్రయాణికుడు సునీతపై దాడి చేసి కంటికింద తీవ్రగాయం చేశాడు. మిగతా ప్రయాణికులందరూ పట్టుకోవడానికి ప్రయత్నించడంతో అక్కణ్నించి పారిపోయాడు.

కండక్టర్ ను అక్కణ్నించి నేరుగా ఆసుపత్రికి తీసుకెళ్లారు. అనంతరం బస్సు డ్రైవర్ పోలీస్ స్టేషన్లో గుర్తు తెలియని వ్యక్తిపై ఫిర్యాదు చేశాడు. అతడి గురించి డ్రైవర్ కు, కండక్టర్ కు కూడా ఎలాంటి వివరాలు తెలియవు. పోలీసులు కేసు నమోదు చేసుకుని దర్యాప్తు ప్రారంభించారు.