ఉద్యోగులకు జగన్ సర్కారు గుడ్ న్యూస్

ప్రభుత్వ ఉద్యోగులకు ఏపీ సీఎం వైఎస్‌ జగన్‌మోహన్‌రెడ్డి సర్కారు శుభవార్త చెప్పింది. ఉద్యోగులకు మధ్యంతర భృతి పెంచుతూ వైఎస్ఆర్సీపీ సర్కారు నిర్ణయం తీసుకుంది. మధ్యంతర భృతిని 27 శాతం పెంచుతూ తాజాగా ఉత్తర్వులు జారీ చేశారు. ఈ నిర్ణయంతో 4 లక్షల మందికి పైగా ప్రభుత్వ ఉద్యోగులకు లబ్ధి చేకూరనుంది. ఈ నిర్ణయంతో ఖజానాపై రూ.815 కోట్ల అదనపు భారం పడనుంది. ప్రభుత్వ ఉద్యోగులకు ఐఆర్ పెంచాలని.. సీఎం హోదాలో జగన్ నిర్వహించిన తొలి క్యాబినెట్ భేటీలోనే నిర్ణయం తీసుకున్నారు. ఐఆర్ పెంపు ఈ నెల నుంచే ప్రభుత్వ ఉద్యోగులకు వర్తిస్తుంది.

స్థానిక సంస్థలు, ప్రభుత్వ సాయంతో నడిచే సంస్థలకు కూడా ఐఆర్ పెంపు నిర్ణయం వర్తిస్తుంది. స్టేట్ జ్యూడీషియల్ సర్వీసులు, ఆలిండియా సర్వీస్ ఆఫీసర్లు, యూజీసీ/ఏఐసీటీఈ/ఐసీఏఆర్/కేంద్ర ప్రభుత్వ స్కేల్స్ ఆధారంగా జీతం పొందుతున్నవారు.. కాంట్రాక్ట్ ఉద్యోగులు, అటామనస్ బాడీలు, గవర్నమెంట్ అండర్‌టేకింగ్ సంస్థల్లో పని చేస్తున్న వారికి ఐఆర్ పెంపు నిర్ణయం వర్తించదు.