చంద్రబాబును సీఎంగా సంబోధించిన జగన్.. ఏపీ అసెంబ్లీలో ఆసక్తికర సన్నివేశం

ఆంధ్రప్రదేశ్‌ అసెంబ్లీలో శుక్రవారం ఆసక్తికర సన్నివేశం కనిపించింది. సభలో టీడీపీ హయాంలో పునరుత్పాదక విద్యుత్‌ కొనుగోళ్లకు సంబంధించిన జరిగిన ఒప్పందాలపై శుక్రవారం అసెంబ్లీలో చర్చ జరిగింది. ఈ సమయంలో ముఖ్యమంత్రి జగన్ పొరపాటున నోరు జారారు. చంద్రబాబును ముఖ్యమంత్రిగా సంభోదించారు. తర్వాత వైసీపీ సభ్యులు జగన్‌ను అప్రమత్తం చేయడంతో వెంటనే సరి చేసుకున్నారు.

కేంద్ర ప్రభుత్వం మార్గదర్శకాలు, సీఈఆర్సీ మార్గదర్శకాల ప్రకారం పునరుత్పాదక విద్యుత్‌ను కొనుగోలు చేశామన్నారు జగన్. సీఈఆర్సీ మార్గదర్శకాలను ఏపీఈఆర్సీ అనుసరించదని.. ఈ విషయం 40 ఏళ్ల ముఖ్యమంత్రిగా పని చేసిన వ్యక్తికి తెలియదా అంటూ ప్రశ్నించారు. స్క్రీన్ మీద డిస్‌ప్లే చేయిస్తున్నాం.. చూస్తే 'ముఖ్యమంత్రి' గారికి ఈ విషయం అర్థం అవుతుందని జగన్ నోరు జారారు. అంటే చంద్రబాబును పొరపాటున ముఖ్యమంత్రిగా వ్యాఖ్యానించారు.

జగన్ పొరపాటున చంద్రబాబును ముఖ్యమంత్రిగా సంభోదించడాన్ని వైసీపీ సభ్యులు గమనించారు. వెంటనే మాజీ ముఖ్యమంత్రి అని సూచించడంతో.. సీఎం జగన్ సరి చేసుకున్నారు. దీంతో సభలో కాసేపు నవ్వుల పువ్వులు పూశాయి. తర్వాత జగన్ ప్రసంగిస్తోన్న వేళ టీడీపీ నేతలు ఆందోళనకు దిగడంతో.. కుక్క తోక వంకర అని జగన్ ఘాటైన వ్యాఖ్యలు చేశారు.