ప్రజాస్వామ్యంలో హింసకు తావులేదు: కిడారి మృతిపై జగన్‌ దిగ్భ్రాంతి

అరకు ఎమ్మెల్యే కిడారి సర్వేశ్వరరావు మృతి పట్ల వైసీపీ అధ్యక్షుడు, ఏపీ ప్రతిపక్ష నేత వైఎస్ జగన్ దిగ్భ్రాంతి వ్యక్తం చేశారు. ప్రజా ప్రతినిధిగా ఉన్న ఎమ్మెల్యేని మావోయిస్టులు కాల్చిచంపడాన్ని తీవ్రంగా ఖండించాయన. ప్రజాస్వామ్యంలో హింసకు, హత్యలకు తావు లేదని.. కిడారి సర్వేశ్వరరావు, సివేరి సోమ కుటుంబాలకు ప్రగాఢ సానుభూతి తెలిపారు జగన్. కాగా కిడారి సర్వేశ్వరరావు 2014 ఎన్నికల్లో వైసీపీ అభ్యర్థిగా విజయం సాధించారు. అనంతరం మారిన రాజకీయ పరిణామాలతో ఇటీవల చంద్రబాబు సమక్షంలో టీడీపీలో చేరారు.
ఇదిలాఉంటే.. ఎమ్మెల్యే సర్వేశ్వరరావును మావోలు కాల్చిచంపడం వెనుకు క్వారీ వివాదమే కారణం అని తెలుస్తోంది. ఎమ్మెల్యేకు చెందిన గూడ క్వారీ పర్యావరణానికి నష్టం కలిగించేదిగా ఉండటంతో ఈ క్వారీని మూసివేయాలని వారు హెచ్చరించినట్టు తెలుస్తోంది. దీనిపై స్పందించిన ఎమ్మెల్యే.. ఏదైనా ఉంటే చర్చల ద్వారా పరిష్కరించుకోవాలని, బెదింపులకు దిగడం సరికాదని నచ్చజెప్పే ప్రయత్నం చేశారు. దీంతో తీవ్ర ఆగ్రహం వ్యక్తం చేసిన మావోయిస్టులు ఎమ్మెల్యే సర్వేశ్వరరావు, మాజీ ఎమ్మెల్యే సోములపై కాల్పులు జరిపి హత్య చేసినట్టు తెలుస్తోంది.