పాదయాత్ర: మహిళా దినోత్సవ వేడుకల్లో జగన్

ప్రజాసంకల్ప పాదయాత్రలో ఉన్న వైఎస్సార్ కాంగ్రెస్ పార్టీ అధినేత జగన్ మోహన్ రెడ్డి మహిళా దినోత్సవ వేడుకల్లో భాగస్వాములయ్యారు. అంతర్జాతీయ మహిళా దినోత్సవం సందర్భంగా మహిళలతో జగన్ కేక్ కట్ చేయించారు. ప్రస్తుతం జగన్ పాదయాత్ర ప్రకాశం జిల్లా చీరాల నియోజకవర్గంలో సాగుతోంది.

ఈ సందర్భంగా జగన్ మాట్లాడుతూ.. మహిళలు ఆర్థికాభివృద్ధి సాధించాలని, వారు అన్ని రంగాల్లో పురోగమించాలని ఆకాంక్షించారు. చీరాల నియోజకవర్గం సంతరావూరు నుంచి గురువారం రోజున జగన్ పాదయాత్ర ప్రారంభం అయ్యింది. నేటి పాదయాత్ర వేటపాలెం వరకూ సాగుతుందని వైఎస్సార్ కాంగ్రెస్ పార్టీ ప్రకటించింది.

నేటితో జగన్ పాదయాత్ర 107వ రోజుకు చేరుకుంది. ఇప్పటి వరకూ జగన్ సుమారు 1,450 కిలోమీటర్ల దూరాన్ని నడిచారు. మొత్తం మూడు వేల కిలోమీటర్ల లక్ష్యంతో జగన్ ప్రజాసంకల్పయాత్రను చేపట్టిన సంగతి తెలిసిందే.