ఐటీ సోదాలంటే బాబుకు భయమెందుకు.. ఆ కుట్ర బయటపడుతుందనా: జగన్

ఏపీలో జరుగుతున్న ఐటీ సోదాలపై చంద్రబాబు ఎందుకు గింజుకుంటాన్నారో చెప్పాలన్నారు వైసీపీ అధినేత జగన్. ఎక్కడో తీగ లాగితే.. తన ఇంట్లో డొంక కదులుతుందని భయపడుతున్నారని విమర్శించారు. విజయనగరం జిల్లా చీపురుపల్లి నియోజకవర్గం గుర్లలో జరిగిన ప్రజా సంకల్పయాత్ర బహిరంగ సభలో ఐటీ దాడులపై జగన్ స్పందించారు. ఎవరిపైనో ఐటీ దాడులు జరిగితే.. చంద్రబాబుకు భయమెందుకని ప్రశ్నించారు జగన్. ఐటీ అధికారులు తనిఖీలు చేస్తుంటే.. అదేదో కేంద్రం రాష్ట్రంపై యుద్ధం చేసినట్లు చిత్రీకరిస్తున్నారన్నారు. గతంలో ఐటీ సోదాలు జరిగినప్పుడు స్పందించని బాబు.. ఇప్పడెందుకు గింజుకుంటున్నారో అర్థం కావడం లేదన్నారు.

చంద్రబాబుకు దోపిడి చేసిన డబ్బు బయటికొస్తుందేమోనని భయపడుతున్నారని జగన్ వ్యాఖ్యానించారు. రాష్ట్రంలో ప్రతి నియోజకవర్గానికి రూ.30కోట్లు తరలించారని విమర్శించారు ప్రతిపక్షనేత. ఆ వివరాలు బయటపడితే.. ఆ డబ్బు ఎక్కడి నుంచి వచ్చిందో ప్రశ్నిస్తారనే భయం పట్టుకుందన్నారు. వైసీపీ ఎమ్మెల్యేలు 23మందిని సంతలో పశువుల్లా కొనుగోలు చేశారని.. ఆ డబ్బు ఎలా వచ్చిందో ఐటీ అధికారులు అడుగుతారనే ఉలిక్కిపడుతున్నారని విమర్శించారు. గతంలో తనపై కుట్రపూరితంగా సీబీఐ దాడులు జరిగినప్పుడు చంద్రబాబుకు కనిపించలేదా అని ప్రశ్నించారు. టీడీపీ పాలనలో రాష్ట్రం మొత్తం అవినీతి తప్ప అభివృద్ధి జరగడం లేదన్నారు.

నాలుగేళ్లలో విజయనగరం జిల్లాలో అభివృద్ధి జరగలేదన్నారు జగన్. జిల్లాలో 16 మిల్లులు ఉంటే నాలుగేళ్ల కాలంలో 6 మిల్లులు మూతపడ్డాయన్నారు. దివంగత ముఖ్యమంత్రి వైఎస్ హయాంలో తోటపల్లి ప్రాజెక్టు పనులు పరుగులు పెట్టాయని.. 2014నాటికి 90శాతం పూర్తయ్యాయని.. మిగిలిన 10శాతం పనుల్ని టీడీపీ ప్రభుత్వం పూర్తి చేయలేకపోయిందని విమర్శించారు. అగ్రిగోల్డ్ మోసంలో ఎక్కువగా నష్టపోయింది ఉత్తరాంధ్రా ప్రజలేనని.. వారికి ఇప్పటి వరకూ నష్టపరిహారం చెల్లించలేదన్నారు. లక్షల ఉద్యోగాలిచ్చామని బాబు గొప్పలు చెప్పుకొంటున్నారని.. కొత్త ఉద్యోగాల సంగతి పక్కన పెడితే.. ఉన్న ఉద్యోగాలనే ఊడపీకేస్తున్నారని విమర్శించారు.