అన్నొస్తున్నాడు కాదు ‘ప్రజా సంకల్ప యాత్ర’

ఆంధ్రప్రదేశ్‌లోని ప్రజా సమస్యలు నేరుగా తెలుసుకునేందుకు వైసీపీ అధినేత జగన్మోహన్ రెడ్డి పాదయాత్ర చేపట్టనున్న విషయం తెలిసిందే. ఈ పాదయాత్ర నవంబరు 6 నుంచి ప్రారంభం కానుంది. కడప జిల్లా ఇడుపులపాయ నుంచి ప్రారంభమయ్యే ఈ పాదయాత్ర శ్రీకాకుళం జిల్లా ఇచ్ఛాపురం వరకు కొనసాగనుంది. ఈ పాదయాత్రను 'అన్నొస్తున్నాడు' అనే పేరుతో చేపట్టాలని గతంలో అనుకున్నారు. అయితే, గురువారం జరిగిన వైసీపీ శాసనసభాపక్ష సమావేశంలో పాదయాత్ర పేరును 'ప్రజా సంకల్పం'గా మార్చారు. ప్రజల్లో ఉన్న బలమైన సంకల్పాన్ని ఈ పేరు సూచిస్తుందని వైసీపీ నేతలు పేర్కొంటున్నారు. పాదయాత్ర సందర్భంగా జిల్లాల్లో చేపట్టాల్సిన కార్యక్రమాలపై కూడా చర్చించారు.

హైదరాబాద్‌లో జరిగిన వైఎస్‌ఆర్‌ కాంగ్రెస్‌ పార్టీ విస్తృతస్థాయి సమావేశంలో ఈ నిర్ణయం తీసుకున్నారు. ఆరు నెలల పాటు 13 జిల్లాల్లో 125 నియోజకవర్గాల్లో 3వేల కిలోమీటర్ల మేర వైఎస్‌ జగన్‌ పాదయాత్ర చేయనున్నారు. పాదయాత్ర నేపథ్యంలో పార్టీ ప్రణాళిక, ప్రభుత్వ వైఫల్యాలను ప్రజల్లోకి ఎలా తీసుకెళ్లాలనే అంశంపై ఈ సమావేశంలో చర్చించారు. పాదయాత్ర జరుగుతున్న ప్రాంతాలు, జరగని ప్రాంతాల్లో ఏ విధంగా ముందుకు వెళ్లాలని అనే అంశాలపై పార్టీ అధ్యక్షుడు వైఎస్‌ జగన్‌ దిశానిర్దేశం చేశారు. మిగిలిన 58 నియోజకవర్గాల్లో పాదయాత్ర అనంతరం బస్సు యాత్ర నిర్వహించనున్నారు.