'టీడీపీ ఆఫీస్‌లో జగన్ ఫోటో పెట్టుకో'.. బాబుపై దాడి సెటైర్లు

టీడీపీ ఆఫీసులో జగన్ ఫోటో పెట్టుకోవాలని సలహా ఇస్తున్నారు వైసీపీ సీనియర్ నేత దాడి వీరభద్రరావు. జగన్ దయతో ఆధారపడి టీడీపీ బతుకుతోందని ఎద్దేవా చేశారు. చంద్రబాబులా జగన్ ఫిరాయింపులను ప్రోత్సహిస్తే టీడీపీలో ఒక్క ఎమ్మెల్యే కూడా ఉండరన్నారు. టీడీపీలో ఒక్క చంద్రబాబు నాయుడే మిగిలిపోతారన్నారు. శుక్రవారం విశాఖలో జరిగిన మీడియా సమావేశంలో మాట్లాడిన వీరభద్రరావు చంద్రబాబుపై విరుచుకుపడ్డారు.

బాబు నీతి, నియమాలు, విధివిధానాలు లేని వ్యక్తని దాడి విమర్శించారు. రోజుకో మాట పూటకో విధానం ఆయన నైజమన్నారు. పార్టీ ఫిరాయింపులకు పాల్పడి నైతిక విలువలను తుంగలో తొక్కిన చంద్రబాబు.. తనకంటే చిన్నవాడైన వైఎస్‌ జగన్‌‌ను చూసి నైతిక విలువలు నేర్చుకోవాలన్నారు. ఇప్పటికైనా చంద్రబాబు నాయుడు నైతిక విలువలు పాటిస్తే గౌరవం దక్కుతుందన్నారు.

పదవులకు రాజీనామా చేయకుండా పార్టీ ఫిరాయించే నేతలను అనర్హులను చేసి, వారి సభ్యత్వాన్ని రద్దు చేస్తానని జగన్ ప్రకటించడం దేశానికే ఆదర్శమన్నారు. ఈ నిర్ణయాన్ని దేశంలోని అన్ని చట్టసభల్లోనూ అమలు చేయాలని కోరారు. జగన్ నిర్ణయాన్ని ప్రతి ఒక్కరూ స్వాగతిస్తున్నారన్నారు దాడి వీరభద్రరావు.