Operation Garuda: 'ఆపరేషన్ గరుడ' తీగ లాగాల్సిందే.. హీరో శివాజీపై వైసీపీ ఫిర్యాదు

ఆపరేషన్ గరుడ ఏపీ రాజకీయాల్లో వేడి పుట్టిస్తోంది. ఏడు నెలల క్రితం మళ్లీ తెరపైకి వచ్చిన గరుడ.. మళ్లీ జగన్‌పై దాడితో తెరపైకి వచ్చింది. ఆపరేషన్ గరుడలో భాగంగానే జగన్‌పై దాడి పేరుతో డ్రామాలాడుతున్నారని టీడీపీ ఆరోపిస్తుంటే.. ఈ ఆపరేషన్‌కు స్క్రీన్ ప్లే, డైరెక్షన్ మొత్తం చంద్రబాబుదేనంటూ వైసీపీ కౌంటర్ ఇస్తోంది. ఈ కుట్రలో భాగంగానే.. జగన్‌పై దాడి జరిగిందని ఆరోపిస్తోంది. నిన్నటి వరకు మాటల యుద్ధానికి పరిమితమైన ఈ ఆపరేషన్ గరుడ వ్యవహారం.. ఇప్పుడు పోలీసుల దగ్గరకు చేరింది. ఈ ఆపరేషన్ గరుడ సంగతి ఏంటో తేల్చాలంటూ.. వైసీపీ నేతలు విజయవాడ సీపీకి ఫిర్యాదు చేశారు. ఈ వ్యవహారంలో హీరో శివాజీ ప్రశ్నించాలంటూ ఫిర్యాదు చేశారు.

విజయవాడకు చెందిన వైసీపీ నేతలు మల్లాది విష్ణు, వెల్లంపల్లి శ్రీనివాస్, గౌతంరెడ్డిలు సీపీ ద్వారకా తిరుమలరావును కలిశారు. ఆపరేషన్ గరుడ పేరుతో హీరో శివాజీ చేసిన వ్యాఖ్యలపై విచారణ జరపాలని ఫిర్యాదు చేశారు. గరుడలో భాగంగా జగన్‌పై దాడి జరగబోతోందని.. శివాజీకి ముందే ఎలా తెలుసో తేల్చాలన్నారు. అవసరమైతే నటుడిపై కేసు నమోదు చేయాలని డిమాండ్ చేశారు. ఈ మేరకు వినతి పత్రం కూడా సీపీకి అందజేశారు.

సీపీకి ఫిర్యాదు చేసిన అనంతరం మాట్లాడిన నేతలు.. జగన్‌పై దాడి కేసులో శివాజీ పాత్ర ఉందని అనుమానం వ్యక్తం చేశారు. శివాజీని ఉపయోగించి చంద్రబాబు ఈ కుట్రలు చేస్తున్నారని మండిపడ్డారు. ఆ కుట్రలో భాగంగానే జగన్‌పై హత్యాయత్నం జరిగిందంటున్నారు. శివాజీ గరుడ గురించి చెప్పడం... శ్రీనివాసరావు హత్యాయత్నం చేయడం.. శివాజీ ముందే చెప్పాడంటూ చంద్రబాబు సమర్ధించడం కుట్రకు నిదర్శమన్నారు. శివాజీకి ముందస్తుగా ఈ సమాచారం ఎలా వచ్చిందని, ఈ సమాచారం అందించిన వారు ఎవరో బయట పెట్టాలన్నారు.