మంత్రి అఖిలప్రియపై రోజా ఫైర్

నంద్యాల ఉపఎన్నిక సందర్భంగా అధికార, విపక్షాల మధ్య మాటల యుద్ధం తారాస్థాయికి చేరుకుంది. మొన్నటికి మొన్న వైఎస్సార్ కాంగ్రెస్ అధినేత జగన్మోహన్ రెడ్డి ముఖ్యమంత్రి చంద్రబాబును నడిరోడ్డుపై కాల్చేయాలంటూ చేసిన వ్యాఖ్యలు తీవ్ర కలకలం రేపాయి. దీనిపై తెలుగుదేశం పార్టీ గత రెండు రోజులుగా ఏపీ వ్యాప్తంగా నిరసన కార్యక్రమాలు చేపట్టింది. ఈ రోజు నంద్యాల ప్రచారంలో పాల్గొన్న వైసీపీ ఎమ్మెల్యే రోజా మంత్రి అఖిలప్రియపై తీవ్ర వ్యాఖ్యలు చేశారు. తండ్రి చితి ఆరకముందే మంత్రి పదవి కోసం సంప్రదాయాలన్నింటినీ తుంగలో తొక్కిన నువ్వా, మా గురించి మాట్లాడేది? అంటూ భూమా అఖిలప్రియపై రోజా ధ్వజమెత్తారు. ఉపఎన్నికల సందర్భంగా ప్రచారానికి రోజా వెళ్లిన సమయంలో వైసీపీ, టీడీపీ కార్యకర్తల మధ్య తోపులాట చోటుచేసుకుంది. పోలీసులు జోక్యంచేసుకుని ఇరువర్గాలను చెదరగొట్టడంతో పరిస్థితి సద్దుమణిగింది. అనంతరం రోజా మాట్లాడుతూ, చివరి రక్తపు బొట్టు వరకు శోభానాగిరెడ్డి చంద్రబాబునాయుడుకు వ్యతిరేకంగా పోరాడారని గుర్తు చేశారు.

భూమా నాగిరెడ్డి మరణానికి కారణం ఎవరో తెలుసుకోవాలని అఖిల ప్రియకు రోజా సూచించారు. 'సొంత మామ ఎస్వీ మోహన్‌రెడ్డి నీ ఇంటికి వచ్చే పరిస్థితి లేకుండా చేసుకున్నావని' ఆమె ఎద్దేవా చేశారు. జగన్ నైతికతను ప్రశ్నించే ముందు నువ్వేం చేస్తున్నావో తెలుసుకోవాలని రోజా సూచించారు. నంద్యాలకు ఏం చేశారో చెప్పలేక, తల్లిదండ్రుల పేర్లు చెప్పి సానుభూతితో ఓట్లు పొందేందుకు ప్రయత్నిస్తున్నావని రోజా మండిపడ్డారు. ఏ పార్టీ కార్డుతో గెలిచి, ఏ పార్టీలో ఉన్నావో గుర్తుంచుకోవాలని చెబుతూ, నంద్యాల ప్రజలు అసహ్యించుకుంటున్నారన్నది గ్రహించాలని ఆమె సూచించారు. అలాగే జగన్‌ను విమర్శించే అర్హత నీకు లేదని, ఆయన నైతికతను ప్రశ్నించే స్థాయి నీదికాదంటూ ఆగ్రహం వ్యక్తం చేశారు. 20 మంది ఎమ్మెల్యేల చేత రాజీనామా చేయించే దమ్ము, ధైర్యం చంద్రబాబుకు లేదని రోజా వ్యాఖ్యానించారు.