రూ. 3వేలకే 4జీ ఫీచర్ ఫోన్!

ప్రస్తుతం ఎవరి జేబులో చూసినా స్మార్ట్‌ఫోనే. 4జీ టెక్నాలజీ వచ్చిన తరవాత వీటి వాడకం మరింత పెరిగిపోయింది. రూ. 5వేలలోనే 4జీ స్మార్ట్‌ఫోన్‌లు అందుబాటులో ఉండటంతో ఫీచర్ ఫోన్లకు ఇంచుమించుగా స్వస్తి చెప్పేసారు. ఇలాంటి సమయంలోనూ దేశీ కంపెనీ లావా కొత్తగా ఓ ఫీచర్ ఫోన్‌ను తీసుకొచ్చింది. అయితే ఇది మార్కెట్‌లో లభించే సాధారణ ఫీచర్ ఫోన్ లాంటిది కాదు. 4జీ నెట్‌వర్క్‌పై పనిచేసే లేటెస్ట్ స్మార్ట్ ఫీచర్ ఫోన్. ధర కూడా కేవలం రూ. 3,333 మాత్రమే.

లావా కనెక్ట్ ఎం1 పేరుతో వచ్చిన ఈ తొలి 4జీ ఎనేబుల్డ్ స్మార్ట్ ఫీచర్ ఫోన్‌లో 1.2 గిగాహెడ్జ్ క్వాడ్‌కోర్ ప్రాసెసర్‌ను అమర్చారు. అలాగే 512 ఎంబీ ర్యామ్, 2.4 అంగుళాల డిస్ప్లే, వీజీఏ కెమెరా తదితర ఫీచర్లున్నారు. 4జీ వీవోఎల్‌టీఈ నెట్‌వర్క్‌పై పనిచేసే ఈ ఫోన్‌లో ఫేస్‌బుక్ లైట్ యాప్‌తో పాటు మెసేజింగ్ అప్లికేషన్స్ ప్రీలోడెడ్‌గా ఉంటాయని కంపెనీ వెల్లడించింది. పాలీకార్బోనేట్ బాడీతో వస్తున్న ఈ ఫోన్‌లో 1,750 ఎంఏహెచ్ బ్యాటరీని అమర్చారు.