ఐఫోన్ 8కి ఎల్జీ త్రీడీ కెమెరా!

యాపిల్ నెక్ట్స్ జనరేషన్ ఐఫోన్ 8పై కొన్ని రూమర్లు హల్‌‌చల్ చేస్తున్నాయి. ఐఫోన్ 8లో వాడుతున్న ఓలెడ్ డిస్ప్లే‌ను సామ్సంగ్ అందిస్తున్నట్లు ఇప్పటికే వార్తలు వచ్చాయి. ఇప్పుడు మరో ఆసక్తికర వార్త బయటికొచ్చింది. సాధారణంగా ఐఫోన్లంటే అత్యుత్తమ కెమెరా నాణ్యత ప్రధానమైనది. అయితే వచ్చే ఐఫోన్ 8లో ఉపయోగించనున్న 3డీ ఫేస్-రికగ్నిషన్ ముందు కెమెరాను ప్రముఖ ఎలక్ట్రానిక్స్ కంపెనీ ఎల్జీ అందిస్తోందట.

ఐఫోన్ 7 ప్లస్‌లో ఉపయోగించిన డ్యుయల్ రేర్ కెమెరాను ఎల్జీనే అందించిందని.. ఇప్పుడు ఐఫోన్ 8లో ఫ్రంట్ ఫేసింగ్ కెమెరా భాగాలను ఎల్టీ సరఫరా చేస్తోందని అంటున్నారు. ప్రస్తుతం సామ్సంగ్ గెలాక్సీ ఎస్8లో వాడిన 2డీ ఫేస్-రికగ్నిషన్ టెక్నాలజీ కంటే ఐఫోన్ 8 కోసం ఎల్టీ అందిస్తోన్న 3డీ రికగ్నిషన్ టెక్నాలజీ అత్యుత్తమమైనదట.

అయితే ఐఫోన్ 8లో 3డీ సెన్సింగ్ టెక్నాలజీని వాడుతున్నట్లు గతంలో వార్తులు వచ్చాయి. ఈ 3డీ సెన్సింగ్ టెక్నాలజీ కోసం ‘ల్యుమెంటమ్’ అనే కంపెనీతో యాపిల్ సంప్రదింపులు జరుపుతోందని బీజీఆర్ వెబ్‌సైట్ ఈ ఏడాది ఫిబ్రవరిలో ప్రచురించింది. అయితే ఇంతకీ యాపిల్ ఏ టెక్నాలజీని వాడుతుందనే విషయంపై ఇంకా స్పష్టతలేదు. దీనికిపై యాపిల్ కూడా ఎలాంటి వివరణ ఇవ్వలేదు.