వయసు 50.. సొగసు 20.. ఈమెకే సాధ్యం!

వయసు పైబడినా ఇంకా యవ్వనంలో ఉన్నట్లు కనబడటం సాధ్యమేనా? అంటే మనలో చాలా మంది అబ్బే కుదరదండి.. అంటారు. కానీ చైనాకు చెందిన ఓ మహిళ దీన్ని నిరూపిస్తోంది. 50 ఏళ్ల వయసులోనూ 20 ఏళ్ల యువతిలా కనిపిస్తూ అందరినీ ఆశ్చర్యానికి గురిచేస్తోంది. చైనాకు చెందిన లు యెలిన్ వయసు సుమారు 50 ఏళ్లు. ఆమెకు ఇద్దరు పిల్లలు కూడా ఉన్నారు. కానీ తన 22 ఏళ్ల కొడుకుతో కలసి బయటికి వెళ్తే అందరూ అతన్ని లు బాయ్‌ఫ్రెండ్ అనుకుంటున్నారు. దీన్ని బట్టి అర్థమవుతోంది.. లు ఎంత యవ్వనంగా కనిపిస్తోందో!

మెరుపుతీగలాంటి శరీరం.. మెరిసిపోయే రంగు.. ఇప్పటికీ తగ్గని చలాకీతనం.. ఆమెను ఇంకా యవ్వనంలోనే ఉంచుతున్నాయి. బయటికి వెళ్లినప్పుడు తన వయసు చెప్పాల్సి వస్తే.. అది విని అక్కడున్నవారు అవాక్కవుతున్నారట. 50 ఏళ్ల ప్రాయంలోనూ ఇంత అందంగా.. ఆకర్షణీయంగా ఎలా ఉన్నారంటూ తన సౌందర్య రహస్యాలు అడుగుతున్నారట.

మొత్తానికి లు యెలిన్ ఓ మీడియా సంస్థకు తన సౌందర్య, ఆరోగ్య రహస్యాలు వెల్లడించింది. 30 ఏళ్లుగా క్రమం తప్పకుండా ఆమె వ్యాయామాలు చేస్తున్నారట. ప్రతిరోజూ ఈత కొడతారట. చలికాలంలో బయటికివెళ్లి నదులు, సరస్సుల్లో ఈత కొట్టడమంటే మహా ఇష్టమట.

చైనాలోని యాంగ్సే నది, దక్షిణ కొరియాలోని హాన్ నదిలో లు ఈత కొట్టారంటే ఆమె స్టామినా ఎలా ఉందో అర్థమవుతుంది. గతేడాదయితే మలేసియాలోని పెనాంగ్ ద్వీపం ఒడ్డు నుంచి మలక్కా వరకు 7.45 మైళ్ల దూరాన్ని 4 గంటల్లో లు ఈదేశారు.

‘మనం రఫ్‌గా కనిపిస్తే.. మనలోని యవ్వనం తగ్గిపోయినట్టే’ అనేది లు మోటో. ఏదేమైనా 50 ఏళ్ల వయసులో 20 ఏళ్ల యవ్వనంతో కనబడటం అంటే మాటలు కాదు. దానికి ఎంతో పట్టుదల ఉండాలి. ముఖ్యంగా అందంగా కనిపించాలనే తాపత్రయం ఉండాలి. అందుకే ఇప్పుడు లు యెలిన్ వార్తల్లో నిలిచారు.