పసుపుతో... ముఖానికి మెరుపు

ముఖఛాయను మెరిపించే సహజ సిద్ధమైన ఔషధం పసుపు. దీనిలో యాంటీ బయోటిక్ లక్షణాలు కూడా ఎక్కువే. వంటింట్లో ఉండే పసుపు డబ్బా ముఖాన్ని మెరిపించడానికి ఎంతో దోహదపడుతుందంటున్నారు సౌందర్య నిపుణులు

చర్మం శుభ్రంగా ఉంటే ఎలాంటి చర్మ సమస్యలు రావు. లేకుంటే మొటిమలు, బ్లాక్ హెడ్స్ వంటివి వస్తుంటాయి. కనుక చెంచా నిమ్మరసం, అరచెంచా పసుపు కలిపి ముద్దలా చేసి ముఖానికి పట్టించాలి. చేతిని కాస్త నీటిని తడుపుకుని ముఖానికి మర్దనా చేయాలి. జిడ్డు చర్మతత్వం ఉన్నవారికి పసుపు బాగా పనిచేస్తుంది. సున్నిత చర్మతత్వం ఉన్న వారు మాత్రం నిమ్మరసంలో పసుపు కు బదులు రోజ్ వాటర్ లేదా పాలు కలుపుకోవాలి.


ముఖం తాజాగా కనిపించాలంటే అరచెంచా పసుపులో చెంచా తేనె కలపాలి. ఆ మిశ్రమాన్ని ముఖానికి పట్టించి పది నిమిషాలు వదిలేయాలి. తరువా గోరు వెచ్చటి నీళ్లతో కడిగేసుకోవాలి. అలాగే రెండు చెంచాలు అరగదీసిన గంధంలో, అర చెంచా పసుపు, కాస్త రోజ్ వాటర్ కలిపి పేస్టులా చేసుకోవాలి. దీనిని ముఖానికి పట్టించి పావుగంట పాటూ అలా వదిలేయాలి. తరువాత గోరువెచ్చని నీళ్లతో ముఖం కడిగేయాలి. ఇలా తరుచూ చేస్తుంటు ముఖం మృదువుగా మారుతుంది.

రెండు చెంచాల పాలలో, అరచెంచా పసుపు కలపాలి. దూదిని అందులో ముంచి ముఖంపై రాస్తూ శుభ్రం చేయాలి. అయిదు నిమిషాల పాటూ ఇలా చేశాక ముఖం శుభ్రం చేసుకోవాలి. చర్మంపై పేరుకున్న జిడ్డు, మురికి పోతాయి. ముఖానికి కొత్త కళ వస్తుంది.