మోచేతులపై నల్లటి మచ్చలు మాయమవ్వాలంటే!

చాలా మందికి మోచేతులు, మోకాళ్లు, చంకల్లో చర్మం నల్లగా మారుతుంటుంది. దీని వల్ల ఏ సమస్యా లేకపోయినప్పటికీ.. చూడటానికి ఇబ్బందికరంగా ఉంటుంది. కొందరిలో వయసు పెరిగే కొద్దీ ఈ సమస్య పెరుగుతుంటే మరి కొందరిలో సూర్యరశ్మి కారణంగా తలెత్తుతుంది. మోచేతులు, మోకాళ్ల వద్ద చర్మం చాలా పలుచగా ఉండటంతోపాటు ఆ ప్రాంతాల్లో ఎలాంటి గ్రంథులు ఉండవు. దీంతో మిగతా శరీర భాగాలతో పోలిస్తే అక్కడ చర్మం పొడిగా ఉంటుంది. వెంట్రుకలను తొలగించడానికి షేవింగ్ చేయడం, కాస్మొటిక్స్ వాడటం వల్ల చంకల్లో చర్మం నల్లగా మారుతుంది. ఈ సమస్య నుంచి సహజ మార్గాల్లోనే బయటపడొచ్చు. అందుకోసం ఏం చేయాలంటే..

కలబంద చర్మానికి మెరుపునిస్తుంది. చర్మంపై ఉండే మచ్చలను తొలగిస్తుంది. చర్మాన్ని ఆరోగ్యంగా ఉంచడంలో, క్యాన్సర్ రాకుండా చూడటంలోనూ కలబంద ఉపయోగపడుతుంది. అలోవిరా జెల్‌ను రాసి 20 నిమిషాల తర్వాత కడిగేయడం వల్ల ప్రయోజనం ఉంటుంది.

నిమ్మలో ఉండే విటమిన్-సి మృత చర్మ కణాలను తొలగించడానికి ఉపయోగపడుతుంది. నల్లగా ఉన్న మోకాలు, మోచేతి భాగాల్లో నిమ్మరసం రాసి 20 నిమిషాల తర్వాత వెచ్చని నీటితో కడిగేయాలి. తర్వాత లోషన్ రాయాలి. మరింత మెరుగైన ఫలితం కోసం తేనె కలపవచ్చు.

రాత్రి నిద్రించే ముందు ఆల్మాండ్ ఆయిల్ రాసుకొని నిద్రించడం వల్ల ఫలితం ఉంటుంది. రెండు టేబుల్ స్పూన్ల ఆల్మాండ్ పౌడర్, పెరుగును కలిపి పేస్టులా చేసి దాన్ని చర్మం పొడిగా ఉన్న చోట పూయాలి. రోజు విడిచి రోజు రెండు వారాలపాటు ఇలా చేయడం వల్ల ఫలితం ఉంటుంది.

కీరదోస జ్యూస్‌లో నిమ్మరసం పసుపు కలిపి చంకల్లో రాయడం వల్ల ఆ భాగాల్లో ఏర్పడిన నల్లటి మచ్చలను తొలగించవచ్చు. పసుపు, నిమ్మ వల్ల చర్మం తెల్లగా మారితే, కీరదోస వల్ల చల్లదనం చేకూరుతుంది.