మిస్ టీన్ యూనివర్స్ 2017గా సృష్టి కౌర్‌

మిస్‌ టీన్‌ యూనివర్స్‌-2017గా భారత్‌కు చెందిన సృష్టి కౌర్‌ ఎంపికైంది. నొయిడాకు చెందిన సృష్టి కౌర్‌ మంగళవారం జరిగిన తుది పోటీల్లో విజేతగా నిలిచింది. మిస్‌ యూనివర్స్‌ ఆర్గనైజేషన్‌ ప్రతినిధులే గత ఆరేళ్లుగా ఈ పోటీలను నిర్వహిస్తున్నారు. 15 నుంచి 19 ఏళ్ల లోపు వయసున్న అమ్మాయిలే ఈపోటీలకు అర్హులు. మధ్య అమెరికా దేశం నికరగువా రాజధాని మనగ్వాలోని రూబెన్‌ డారియో నేషనల్‌ థియేటర్‌లో నిర్వహించిన తుది పోటీలో సృష్టి కౌర్‌ 25మందిని వెనక్కినెట్టి కిరీటాన్ని చేజిక్కించుకుంది.

ఈ అందాల పోటీల్లో మెక్సికోకు చెందిన అరేట్రావ, కెనడాకు చెందిన సమంత పిర్రే మొదటి, రెండో ట్రావ రన్నరప్‌లగా నిలిచారు. మిస్ టీన్ కిరీటంతోపాటు బెస్ట్‌ నేషనల్‌ కాస్ట్యూమ్‌ అవార్డును కూడా కౌర్‌ గెలుపొందింది. భారత జాతీయ పక్షి నెమలి అలంకరణలో వస్త్రాలు ధరించిన కౌర్ తన ప్రదర్శనతో ఆహుతులను ఆకట్టుకుంది. సృష్టి కౌర్‌ ప్రస్తుతం లండన్‌ కాలేజ్‌ ఆఫ్‌ ఫ్యాషన్‌లో గ్రాడ్యుయేషన్ చదువుతోంది. ఈ పోటీలకు లాటిన్‌ అమెరికా, కరేబియన్‌ దేశాల నుంచి అధిక సంఖ్యలో యువతులు పాల్గొన్నారు.