వైట్ హెయిర్ సమస్య నుంచి బయటపడాలంటే!

ప్రస్తుతం చాలా మంది యువతీ యువకులు ఎదుర్కొంటున్న సమస్య తెల్ల జుట్టు. 30 ఏళ్లలోపే చాలామందిలో జుట్టు తెల్లగా మారుతోంది. శరీరంలో మెలనిన్ తగినంతగా ఉత్పత్తి కాకపోవడమే కారణం. దీంతోపాటు అనేక ఇతర కారణాల వల్ల కూడా వైట్ హెయిర్ వస్తుంది. కుటుంబంలో ఎవరికైనా తెల్ల జుట్టు త్వరగా వస్తే.. జన్యు కారణాల రీత్యా తర్వాతి తరం వారిలోనూ ఈ సమస్య కనిపిస్తుంది. ఒత్తిడి, అనారోగ్యకరమైన జీవన విధానాలు కూడా జుట్టు తెల్లబడేందుకు కారణమవుతున్నాయి. ఈ సమస్యను కొబ్బరి నూనెతోనే పరిష్కరించుకోవచ్చు. అదెలా.. రోజూ కొబ్బరి నూనె రాసినప్పటికీ జుట్టు తెల్లబడటం తగ్గడం లేదుగా అంటారా! అయితే ఇలా చేయండి..
రెండు టేబుల్ స్పూన్ల కొబ్బరి నూనెను తీసుకుని అర నిమిషంపాటు స్టౌవ్ మీద వేడి చేయండి. తర్వాత ఆ వెచ్చటి కొబ్బరి నూనెను కుదుళ్లకు తగిలేలా మెల్లగా మసాజ్ చేయండి. ఓ పది నిమిషాల తర్వాత వేడి నీళ్లతో కడిగేసుకోండి. రెండు వారాల పాటు ఇలా చేస్తే.. జుట్టు తెల్లబడటం తగ్గుతుంది.

ఒక టేబుల్ స్పూన్ కర్పూరం పొడిని కొబ్బరి నూనెలో కలుపుకొని ప్రతి రోజూ తలకి మసాజ్ చేసినా ఫలితం ఉంటుంది. ఇలా రోజూ చేసే ఓపిక ఎక్కడిది అంటారా అయితే ఈ చిట్కా ఫాలో అవ్వండి. ఓ కోడిగుడ్డు, కీరదోస, రెండు టీ స్పూన్ల ఆలివ్ ఆయిల్‌ను మిక్సీలో వేసి పేస్టులా చేయండి. ఆ మిశ్రమాన్ని తలకు పట్టించి పదిహేను నిమిషాలపాటు ఉంచి తర్వాత షాంపూ చేసుకోండి. నెలకోసారి ఇలా చేయడం వల్ల జుట్టు దృఢంగా, ఒత్తుగా పెరుగుతుంది. తెల్ల జుట్టు రావడం తగ్గుతుంది. ఐరన్ లోపం వల్ల కూడా జుట్టు తెల్లబడటం, ఊడటం జరుగుతుంది. కాబట్టి ఐరన్ అధికంగా లభించే ఖర్జూర, లివర్ మొదలైన వాటిని ఆహారంలో భాగంగా చేసుకోవాలి.