పొగతాగడం మానేస్తే శరీరంలో ఏం జరుగుతుంది?

ధూమపానానికి దూరంగా ఉండాలని ఎన్నిసార్లు మీకు మీరుగా అనుకున్నారు? ఇలా అనుకున్నవారిలో ఎందరు దానిని ఆచరించారు? అయితే దీన్ని వదిలించుకోవటం అంత సులువుకాదు. ఎంత ప్రయత్నించినా మనసు అటువైపే లాగుతుంది. ఈ అలవాటు మెదడుపై తీవ్ర ప్రభావం చూపడంతో బయటకు రావడం అంత సులభం కాదు. అయితే సిగరెట్ తాగడం మానేసిన 20 నిమిషాల తర్వాత రక్తపోటు, నాడి కొట్టుకోవడం తగ్గుతాయి. రెండు రోజుల పాటు ధూమపానానికి దూరంగా ఉంటే రుచి, వాసన గుర్తించే ఙ్ఞానేంద్రియాల పనితీరు మెరుగుపడుతుంది. ఏడాది పాటు ధూమపానానికి దూరంగా ఉన్నవారికి పొగతాగేవారితో పోల్చుకుంటే గుండె జబ్బులు వచ్చే ప్రమాదం సగానికి తగ్గుతుంది.

పదేళ్ల పాటు పొగతాగడం మానేసిన వారిలో ఊపిరితిత్తుల కేన్సర్ ముప్పు 50 శాతం, పాంక్రియాటిక్ కేన్సర్ ముప్పు కూడా తగ్గుముఖం పడుతుంది. పదిహేనేళ్లు ధూమసానానికి దూరంగా ఉన్నవారికి, పొగ అలవాటు లేనికి వారికి హృద్రోగ‌ ముప్పు ఒకేలా ఉంటుంది.

పొగతాగడం అలవాటు కారణంగా ప్రతి 8 నిమిషాలకు ఒకరు మరణిస్తున్నారు. దీని వల్ల ఏటా 4.9 మిలియన్ మంది మృత్యువాత పడుతున్నారు. 2030 నాటికి ఇలా మరణించే వారి సంఖ్య 10 మిలియన్లకు చేరుకుంటుందని అంచనా. నగరాలలో పాశ్చాత్య పోకడల కారణంగా మహిళల్లోనూ పొగతాగే అలవాటు పెరుగుతోంది. పొగాకు వల్ల వచ్చే క్యాన్సర్లలో పురుషులు 56 శాతం వరకు ఉంటే, మహిళల్లో ఈ సంఖ్య 44 శాతం వరకు ఉన్నట్లు నివేదికలు ఘోషిస్తున్నాయి.