మొటిమలు మీ ఆరోగ్యం గురించి ఏ చెబుతున్నాయ్?

కొందరికి ముఖం మీద మొటిమలు ఎక్కువగా వస్తుంటాయి. యుక్త వయస్కుల్లో ఇది సాధారణంగా వచ్చే సమస్యే. మొటిమలు రావడం వల్ల చర్మం జిడ్డుగా, అందవికారంగా మారుతుంది. వాటిని గిల్లడం వల్ల ముఖంపై మచ్చలు ఏర్పడతాయి. మొటిమలు వచ్చిన వారి చర్మం తొందరగా ముడతలు పడదనే విషయం ఊరట కల్గించేదే అయిప్పటికీ.. మొటిమల వల్ల అనేక ఇబ్బందులు తలెత్తుతాయి. నుదుటి మీద మొటిమలు ఉంటే.. జీర్ణ సంబంధ సమస్యలు ఉన్నాయని అర్థమట. కాబట్టి నుదుటిపై మొటిమలు వచ్చిన వారు జంక్ ఫుడ్ తినడాన్ని తగ్గించుకోవాలి. కీరదోస లాంటి వాటిని ఆహారంలో భాగం చేసుకోవాలి.

రెండు కళ్ల మధ్య భాగంలో మొటిమలు వస్తున్నట్లయితే కాలేయంపై ప్రభావం ఉందన్న మాట. ఇలా మొటిమలు వచ్చినవారు పాల ఉత్పత్తులు, ఆల్కహాల్ తీసుకోవడం తగ్గించాలి. అలాగే నూనె పదార్థాలకు దూరంగా ఉండాలి.

దంతాలు అపరిశుభ్రంగా ఉండటం వల్ల నోటి ఆరోగ్యం దెబ్బతింటుంది. ఫలితంగా నోటి చుట్టూ ఉన్న ప్రాంతాల్లో ఇన్ఫెక్షన్ల కారణంగా చర్మం దెబ్బతింటుంది. కాబట్టి రోజూ ఉదయం సమయంలోనే కాకుండా రాత్రి నిద్రకు ఉపక్రమించే ముందు కూడా బ్రష్ చేసుకోవడం మంచిది.

ముక్కు మీద మొటిమలు ఉండటం అనేది రక్తపోటును, గుండెకు సంబంధించిన సమస్యలను సూచిస్తుంది. కాబట్టి ఆరోగ్యకరమైన ఆహారం తీసుకోవడంపై శ్రద్ధపెట్టాలి.

దవడ భాగంలో మొటిమలు ఉన్నాయంటే.. పేగు సంబంధ సమస్యలు, హార్మోన్ల మార్పులు సంభవిస్తున్నాయని అర్థం. కొంత మంది ఆడవాళ్లలో పీరియడ్స్ సమయంలో ఇలాంటి సమస్య కనిపిస్తుంది. మొటిమలు ఎక్కువగా ఇబ్బంది పెడుతుంటే ముఖాన్ని ఎక్కువసార్లు చల్లని నీటితో శుభ్రంగా కడుక్కోవాలి.