కడుపును క్లీన్‌గా, హెల్తీగా ఉంచుకోవాడానికి చాలా మార్గాలు ఉన్నాయి. ఆయుర్వేద చిట్కాలతో కడుపును ఆరోగ్యంగా ఉంచుకోవచ్చని ఆయుర్వేద డాక్టర్ దీక్షా భావ్సర్‌ అన్నారు.
ఆయుర్వద చిట్కాలు
సోంపు..
సోంపు మౌత్‌ ఫ్రెషనర్‌గా పనిచేస్తుందని డాక్టర్ దీక్షా అన్నారు. తీవ్రమైన పొట్ట సమస్యలను దూరం చేయడానికి సోంపు సహాయపడుతుందని స్పష్టం చేశారు. 100 గ్రాముల సోంపులో 40 గ్రాముల ఫైబర్‌ ఉంటుంది. ఇది ఆహారం జీర్ణ కావడానికి సహాయపడుతుంది. జీర్ణ సంబంధ సమస్యలతో బాధపడేవారు ఆహారం తీసుకున్న తర్వాత దీన్ని తింటే ఉపశమనం లభిస్తుంది. మలబద్ధకం సమస్యను తగ్గిస్తుంది. సోంపి తింటే.. బెల్లీ ఫ్యాట్‌ కరుగుతుంది, జీవక్రియ మెరుగుపడుతుంది. సోంపు టీ తయారు చేసుకుని కూడా తాగొచ్చు. కాసిన్ని సోంపు గింజలు తీసుకోని, నీరు పోసి 5 నిమిషాల పాటు మరిగించాలి. తరవాత ఈ సోంపు వాటర్‌ని వడగట్టుకోవాలి. ఈ నీటిని ఉదయం పూట తాగితే మంచిది. నచ్చిన వారు ఇందులో నిమ్మరసం కలిపి తాగవచ్చు.
జీలక్రర..
జీలకర్రను రాత్రిపూట నీటిలో నానబెట్టి ఆ నీటిని ఉదయం ఖాళీ కడుపుతో తీసుకోవడం వల్ల పొట్ట సమస్యలు పరిష్కారం అవుతాయి. జీలకర్ర నీరు తీసుకుంటే మలబద్ధకం, వికారం వంటి వ్యాధులను దూరం చేసుకోవచ్చని డాక్టర్ దీక్షా అంటన్నారు. ఇందులో ఉండే మూలకాలు జీర్ణక్రియను మెరుగుపరచడానికి సహాయపడుతుంది. మీరు జీర్ణ సమస్యలతో బాధపడుతుంటే తప్పకుండా ఉదయం ఈ డ్రింక్‌ను తీసుకోవాలి. ఇందులో కార్బోహైడ్రేట్లు, గ్లూకోజ్, కొవ్వును విచ్ఛిన్నం చేసే ఎంజైమ్స్ ఉంటాయి. ఇవి పొట్ట సమస్యలను సులభంగా నియంత్రిస్తాయి.
వాము, ఉప్పు
ఆహారం సరిగా జీర్ణం కాని వారు.. అన్నంలో కొద్దిగా ఉప్పు, కొద్దిగా వాము కలిపి తినవచ్చు. వాము కడుపులో యాసిడ్స్‌ ఉత్పత్తి అయ్యేలా చేస్తుంది. అజీర్తి, కడుపు ఉబ్బరం, గ్యాస్, అల్సర్ సమస్యలను పరిష్కరిస్తుంది. వాములో ఉండే థైమోల్, కార్వాక్రోల్.. బ్యాక్టీరియా, ఫంగస్‌లతో పోరాడతాయి. వాము జీర్ణశక్తిని మెరుగుపరిచి ఆకలిని పెంచుతుంది. కడుపు నొప్పిని తగ్గిస్తుంది. వాములో ఔషధ గుణాలెక్కువ. విరోచనాలతో బాధపడుతున్నవారు వాము నీళ్లను తాగితే ఉపశమనం లభిస్తుంది.
ఇంగువ..
పులిహోరలో, పప్పులో చిటికెడు ఇంగువ వేస్తే చాలు.. వాటి టేస్ట్‌ నెక్ట్స్‌ లెవల్‌ ఉంటుంది. ఇంగువ జీర్ణ రసాలు ఉత్పత్తి అవడానికి తోడ్పడుతుంది. ఎంజైమ్‌ల చర్యను ప్రభావితం చేస్తుంది. దీంట్లో ఔషధాల గుణాలూ ఎక్కువే.అజీర్తి, కడుపులో మంట, అన్నం సరిగా జీర్ణమవకపోవడం లాంటి సమస్యల నుంచి దూరంగా ఉండాలంటే కూరల్లో చిటికెడు ఇంగువ చేర్చుకుంటే సరి. గ్లాసు మజ్జిగలో దీన్ని వేసుకుని తాగితే జీర్ణవ్యవస్థ ఆరోగ్యంగా ఉంటుంది. ఆకలి లేకపోవడం లాంటి సమస్యలతోపాటు జీర్ణ సంబంధ వ్యాధులను తగ్గిస్తుంది.
యాలకులు..
యాలకులు సువాసనా, రుచీ కోసం స్వీట్స్‌, మరి కొన్ని వంటల్లో వేస్తూ ఉంటాం. యాలకలు కడుపు ఆరోగ్యానికీ మేలు చేస్తాయి. అన్నం తిన్నాక రెండు యాలకుల్ని నోట్లో వేసుకుంటే చాలు.. ఆహారం పూర్తిగా జీర్ణమవుతుంది. వీటిలోని ఔషధ గుణాలు బ్యాక్టీరియాతో పోరాడతాయి. మెటబాలిజం రేటుని మెరుగు పరుస్తాయి. యాలకులు అల్సర్స్‌ను నయం చేస్తాయని నిపుణులు చెబుతున్నారు.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.