బొట్టు పెట్టుకోవడం మన దేశ సనాతన సాంప్రదాయపు విశిష్ట లక్షణం. మన అమ్మమ్మలు, అమ్మలు.. పెద్ద కుంకుమ బొట్టు పెట్టుకుని నిండుగా కనిపించేవాళ్లు. కాలం మారింది బొట్టు సైజ్‌ మారింది, కుంకుమను.. స్టిక్కర్స్‌ రీప్లేస్‌ చేశాయి. అమ్మాయిలు సాంప్రదాయ దుస్తులు ధరించినప్పుడల్లా.. లుక్‌ పూర్తి కావాలంటే చక్కని, అందమైన బొట్టు పెట్టుకోవాల్సిందే. బొట్టు పెట్టుకుంటే.. ముఖం వెలిగిపోతుంది, ప్రత్యేకమైన కళతో కనిపిస్తుంది. కేవలం అందంగా కనిపించడానికి, సంప్రదాయం కోసం బొట్టు పెట్టుకుంటారని చాలా మంది అనుకుంటారు. అయితే, ఆడవాళ్లు బొట్టు పెట్టుకోవడం వల్ల ఆరోగ్య ప్రయోజనాలు కూడా ఉన్నాయని ఆయుర్వేద నిపుణురాలు డాక్టర్‌ దీక్షా భావసర్‌ అన్నారు.
యోగా ప్రకారం, మహిళలు తమ బొట్టు ధరించే.. స్థలాన్ని అజ్ఞా చక్రం అంటారు, ఇది మానవ శరీరంలో ఆరవ, అత్యంత శక్తివంతమైన చక్రంగా భావిస్తారు. బొట్టు పెట్టుకునేప్పుడు ఈ పాయింట్‌ను రోజుకు చాలా సార్లు ఒత్తుతాం. మానవ శరీరంలో వేల సంఖ్యలో నాడులుంటాయి. వీటన్నింటికీ కేంద్ర స్థానం అజ్ఞా చక్రం.. అంటే కనుబొమ్మల మధ్య స్థానం. ఈ స్థానంలోంచి ప్రాణశక్తి కిరణాలు ప్రసారం అవుతాయి. ఈ స్థానంలో కళ్లు, మెదడు, పిట్యూటరీ గ్రంధికి సంబంధించిన నాడులు ఉంటాయి.
మహిళలు బొట్టు పెట్టుకునేప్పుడు ఆజ్ఞాచక్రంపై ఒత్తుతూ ఉంటారు. స్టిక్కర్‌ ధరించేప్పుడు కూడా దాన్ని సర్దడం, సరిగ్గా పెట్టుకోవడం, తీయడం లాంటివి చేస్తుంటాం. దీని వల్ల ఆజ్ఞాచక్రం వద్ద ఒత్తిడి పడుతుంది. దీంతో నాడులు ఉత్తేజం అవుతాయి. పురుషులు బొట్టు పెట్టుకోలేరు కాబట్టి.. ఆ స్థానంలో కుంకుమ పెట్టుకున్నా, 100 సార్లు ఆ పాయింట్‌ను ప్రెస్‌ చేసినా అనేక ప్రయోజనాలు పొందవచ్చని డాక్టర్‌ దీక్షా అన్నారు.
ఈ లాభాలు ఉంటాయి..
- తలనొప్పి నుంచి ఉపశమనం కలిగిస్తుంది.
- సైనస్‌లను క్లియర్ చేస్తుంది.
- దృష్టిని, కంటి ఆరోగ్యాన్ని మెరుగుపరుస్తుంది.
- మీ చర్మాన్ని యవ్వనంగా ఉంచుతుంది.
- డిప్రెషన్‌ను నివారిస్తుంది.
- వినికిడి శక్తిని మెరుగుపరుస్తుంది.
- జ్ఞాపకశక్తి, ఏకాగ్రతను పెంచుతుంది.
- అంతర్ దృష్టి, అవగాహనను మెరుగుపరుస్తుంది.
- ఒత్తిడితో కూడిన మైగ్రేన్ తలనొప్పిని తగ్గిస్తుంది.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.