Liver health: పసుపు తీసుకుంటే.. లివర్‌ సమస్యలు రావా..?

లివర్ (Liver health) మన శరీరంలో అత్యంత ముఖ్యమైన భాగం. తిన్న ఆహారం జీర్ణం అవ్వాలన్నా, శ‌రీరానికి శ‌క్తి స‌రిగ్గా అందాల‌న్నా, విష ప‌దార్థాలు బ‌య‌టికి వెళ్లాల‌న్నా లివర్ సరిగ్గా పని చేయాలి. ముఖ్యంగా శరీరంలో ఏర్పడే ఇన్ఫెక్షన్లు, కొవ్వులు, రక్తంలోని చక్కెర స్థాయిలను కూడా లివర్‌ నియంత్రిస్తుంది. కొవ్వును తగ్గించడంలో, కార్బోహైడ్రేట్లను నిల్వ చేయడంలో, ప్రోటీన్లను తయారు చేయడంలో సహాయపడుతుంది. మన జీర్ణ వ్యవస్థ సక్రమంగా పనిచేయాలంటే లివర్‌ కీలక పాత్ర పోషిస్తుంది. రోగనిరోధక శక్తి, జీవక్రియ, పోషకాల సరఫరా, నిల్వ చేయటంలో లివర్‌ చాలా అవసరం. లివర్‌ నిరంతరం రక్తాన్ని ఫిల్టర్‌ చేస్తుంది, ముఖ్యమైన హార్మోన్లను, ఎంజైమ్‌లను తయారు చేస్తుంది. ఇది దాదాపు 500 రకాలకు పైగా క్రియలను నిర్వర్తిస్తుంది.

అయితే చెడు అలవాట్ల వల్ల లివర్‌కి సంబంధించిన అనేక తీవ్రమైన వ్యాధులు వచ్చే ప్రమాదం ఉంది. సాధారణంగా ఆల్కహాల్‌ తాగడం, చెడు ఆహార అలవాట్లు, మధుమేహం, హెపటైటిస్‌ బి, సి వంటి కారణాల వల్ల లివర్‌ సమస్యలు వచ్చే అవకాశం ఉంది. లివర్‌ సమస్యల కారణంగా.. బలహీనత, ఆకలి లేకపోవడం, వాంతులు, నిద్రలేమి, రోజంతా అలసటగా అనిపించడం, కాలేయం వాపుతో పాటు వేగంగా బరువు తగ్గడం వంటి సమస్యలు మొదలవుతాయి.
ఆయుర్వేదంలో, లివర్‌ ఆరోగ్యం కాపాడే కొన్ని మూలికలు ఉన్నాయని ఆయుర్వేద వైద్యురాలు డా. అర్చన సుకుమారన్ (BAMS) అన్నారు. లివర్‌ను ఆరోగ్యాంగా ఉంచుకోవడానికి, దాన్ని తరచుగా డీటాక్సిఫై చేయ్యాలని అన్నారు. డీటాక్సిఫికేషన్‌ వల్ల లివర్‌ పనితీరు మరింత మెరుగుపడుతుంనది డా. అర్చన చెప్పారు. కొన్ని మూళికలు లివర్‌ను క్లీన్‌ చేయడానికి ఉపయోగపడతాయని అన్నారు. అవేంటో చూసేయండి..
అశ్వగంధ..

అశ్వగంధ శక్తివంతమైన ఆయుర్వేద మూలిక, ఇది కాలేయం సమతుల్యతను పునరుద్ధరించడంలో సహాయపడుతుందని డా. అర్చన అన్నారు. లివర్‌ కణాలపై ఒత్తిడి, రేడియేషన్ ప్రభావాలు పడకుండా, తగ్గించడంలో అశ్వగంధ సహాయపడుతుంది. రేడియేషన్ వల్ల కలిగిన నష్టాన్నీ నివారిస్తుంది. అశ్వగంధ జీర్ణవ్యవస్థ మెరుగైన పనితీరుకు సహాయపడుతుంది. పిత్త, సంబంధిత ఎంజైమ్‌ల సహజ ఉత్పత్తిని పెంచుతుంది. లివర్‌ ఆరోగ్యం కాపాడుకోవడానికి ప్రతి రోజు అశ్వగంధ పొడి లేదా అశ్వగంధ లేహ్యం తీసుకోవడం మంచిదని డా. అర్చన అన్నారు.
వెల్లుల్లి..

ఒక అధ్యయనం ప్రకారం, లివర్‌ ఆరోగ్యాన్ని కాపాడటంలో వెల్లుల్లి సమర్థవంతంగా పని చేస్తుంది. వెల్లుల్లిలో ఉండే S-allylmer captocysteine సమ్మేళనం నాన్-ఆల్కహాలిక్ ఫ్యాటీ లివర్ చికిత్సలో సహాయపడుతుంది. లివర్‌ను గాయాల నుంచి రక్షిస్తుంది. వెల్లుల్లి నూనెలో యాంటీఆక్సిడెంట్లు పుష్కలంగా ఉంటాయి. ఇవి కాలేయ మంటను తగ్గించడంలో సహాయపడతాయి.
త్రిఫల చూర్ణం..

ఉసిరికాయ, కరక్కాయ, తానికాయలను సమాన పరిమాణంలో తీసుకుని తిఫల చూర్ణం తయారు చేస్తారు. తిఫల చూర్ణం మలబద్ధకం నుంచి ఉపశమనం పొందడానికి ఎక్కువగా వాడతారు. త్రిఫల చూర్ణం లివర్‌ పనితీరు మెరుగుపరచడంలో సమర్థవంతంగా పనిచేస్తుంది. కాలేయ ఆరోగ్యానికి త్రిఫల మాత్రాలు గొప్పగా పనిచేస్తాయని డా. అర్చన అన్నారు.
పసుపు..

పసుపు అందరి వంటగదిలో సాధారణంగా ఉండే వస్తువు. పసుపులో ఎన్నో ఔషధ గుణాలు ఉన్నాయి. పసుపులో యాంటీ ఇన్ఫ్లమేటరీ గుణాలు పుష్కలంగా ఉంటాయి. దీని కారణంగా లివర్‌ సమస్యలను నివారించడంలో సమర్థవంతంగా పని చేస్తుంది. లివర్‌ సెల్స్‌ డీటాక్సిఫై చేసే.. శక్తివంతమైన యాంటీఆక్సిడెంట్‌ గుణాలు పసుపులో ఉన్నాయి. పసుపులో ఉండే హెపాటోప్రొటెక్టివ్ లక్షణాలు కాలేయ సమస్యలు రాకుండా చూసుకుంటాయి.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.