అరటిలోని ఈ భాగంతో మొటిమలు మాయం, తెల్లటి దంతాలు

అరటి పండు ఆరోగ్యానికి మంచిదనే సంగతి తెలిసిందే. ప్రతి రోజూ ఒక అరటి పండు తీసుకుంటే మంచి ప్రయోజనాలు లభిస్తాయి. చాలా మంది అరటి పండును తినేసి తొక్కను పడేస్తుంటారు. కానీ అరటి తొక్కతో అనేక ఉపయోగాలున్నాయి. కొంత మందికి ఎంతగా బ్రష్ చేసుకున్నా దంతాలు పసుపు రంగులోనే కనిపిస్తాయి. అలాంటి వారు అరటి తొక్క లోపలి భాగంతో దంతాలపై రుద్దితే ప్రయోజనం ఉంటుంది. రెండు వారాలపాటు దంతాలను అరటి తొక్కతో రుద్దడం వల్ల మార్పు స్పష్టంగా కనిపిస్తుంది. చాలా మందికి శరీరంపై పులిపిర్లు ఉంటాయి. వాటిపై అరటి తొక్కను ఉంచి దానిపై బ్యాండ్ ఎయిడ్‌తో పట్టీలా వేసి రాత్రంతా అలా ఉంచాలి. కొద్ది రోజులపాటు ఇలా చేస్తే పులిపిర్లు క్రమంగా రాలిపోతాయి. అరటి తొక్కతో సోరియాసిస్ వ్యాధిని పూర్తిగా తగ్గించలేం కానీ.. అది వచ్చిన చోట అరటి తొక్కతో రుద్దడం వల్ల ఉపమశం మాత్రం తప్పక లభిస్తుంది.

చర్మంపై మొటిమలు ఉన్నా, ముఖం ముడుతలు పడుతున్నా నో ప్రాబ్లం. అరటిలో యాంటీ ఆక్సిడెంట్లు పుష్కలంగా ఉన్నాయి. అరటి తొక్కతో మొటిమలు ఉన్నచోట రుద్దండి. 30 నిమిషాలపాటు అలా వదిలేసి కడిగేసుకోవడం వల్ల మొటిమలు తగ్గుతాయి. అలాగే చర్మం ముడతలు పడిన చోట రుద్దినా ఫలితం ఉంటుంది. శరీరంలో ఎక్కడైనా నొప్పిగా అనిపిస్తే.. ఆ ప్రాంతంలో అరటి తొక్కతో రుద్దండి. తప్పకుండా ఉపశమనం లభిస్తుంది.

అరటి పండులో పొటాషియం అధిక మోతాదులో ఉంటుందనే సంగతి తెలిసిందే. అయితే అందులో లభించే పొటాషియంలో 40 శాతం తొక్కలోనే ఉంటుంది. బరువు తగ్గడానికి పొటాషియం ఎంతో అవసరం. జీవక్రియను వేగవంతం చేసి.. ఒంట్లోని కేలరీలు కరగడానికి దోహదం చేస్తుంది.